Agintariak uharteko berdintasunezko ezkontzaren onarpena aztertzen ari diren honetan, Kubako lehen LGTBI hotelak ateak ireki ditu berriro.

Muthu Rainbow Hotel Handia, irla ekialdean dagoen Ciego de Avila probintziako Cayo Guillermon kokatua, 2019ko abenduan inauguratu zuten, baina handik gutxira itxi egin behar izan zuen koronabirusaren pandemia zela eta.

Osasun neurri guztiak hartuta, bost izarreko ostatu horrek lehen bezeroak jasotzen hasi zen azaroaren 15etik aurrera, 10 hilabetez konfinatuta iraun ostean Kubak mugak ireki zituenean.

Batik bat LGTBI komunitateari zuzendutako hotelarekin, Kuba «urrats garrantzitsuak ematen ari da familia kode berriaren alde», esan dio AFP agentziari Marlis Delgadok, ostalaritza zentroko salmenta buruak, herrialdean berdintasunezko ezkontza onartzeko lege-batzorde batek gaur egun aztertzen duen testua erreferentzia hartuta.

«Hori aurrerapen bat da gure gizartearentzat, eta hotela hau hemen izatea», laster Habanan inauguratuko den beste batekin batera, «familia kode horrek oinarri sendoagoa izateko aukera ematen digu, onartua izateko», dio Delgadok.

Lehen asteetan Kanadako turistak izan dira hoteleko bezero ohikoenak, Kubako bidaiariez gain, zehaztu du Delgadok.

Kevin McGrath 37 urteko kanadiarra itsasora ematen duen igerilekuaz gozatzen ari da, eta hortik adierazi du hotela inspirazio iturri izan daitekeela Gobernuak «Kubara iristen diren LGBT pertsona guztientzako aldaketa egokiak» egin ditzan. «Leku atsegina da eta onartuta sentitzen gara», gehitu du.

Familia kodeen legea

Familia kode berriaren testua, Kuban sexu bereko pertsonen arteko ezkontza ahalbidetuko lukeena, urte amaieran Batzar Nazionalak onartzea espero da, gero 2022an galdeketa nazionala egiteko.

Agintariak saiatu ziren gaia 2019an onartutako Konstituzioan sartzen, baina Eliza Ebanjelikoetan eta beste gizarte sektore batzuetan eragin zuen gaitzespenak eztabaida atzeratu zuen.

Hoteleko zuzendariek, orain, ziurtatzen dute atzerriko bezeroek PCR proba bat egin dutela Kubara iritsi baino 72 ordu lehenago, eta kubatarrek osasun txartelak berekin ekartzen dituztela txertaketa eskema osoarekin.

Industria turistikoak, Kubako ekonomiaren motore garrantzitsu bat, kolpe latza jasan du pandemiagatik. Orain, urteko azken 45 egunetan 100.000 bisitari jasotzea aurreikusten du Gobernuak, eta 2022rako 2 milioi turista espero ditu, 2020 baino lehenago urtean sartzen ziren 4 milioietatik urrun.

Erick Hiller, hoteleko bigarren egonaldian hondartzaz gozatzen duen Kanadako beste bisitari bat, hain dago hunkituta ezen legea onartuz gero Kuban ezkontzeko asmoa agertu baituen.

«Gure herrialdean duela urte batzuk onartu zen sexu berekoen arteko ezkontza, ikusten ari gara ea posible den hemen ezkontzea», aitortu du, bere bikotekidearen ondoan.