Lehen aldiz ehun milioi pertsona baino gehiago dira behartutako desplazatuak munduan. Gatazka armatuaren, indarkeriaren, giza eskubideen aurkako erasoen edo edozein motatako jazarpenaren ondorioz beste nonbaitera joandakoen zifra «harrigarria» da Filippo Grandi Errefuxiatuentzako NBEren Agentziaren (ACNUR) buruaren hitzetan. Zenbaki hau «Bberehalako ekintzarako deia» izan behar dela esan du.

ACNURen datu berrien arabera, mundu osoan 90 milioi pertsona ziren indarrez desplazatuta zeudenak 2021aren amaieran, Etiopian, Burkina Fason, Birmanian, Nigerian, Afganistanen eta Kongoko Errepublika Demokratikoan, besteak beste, indarkeria-bolada berriek edo gatazka luzeek bultzatuta.

Horri Ukrainako gerrak izandako eragina gehitu behar zaio. Otsailean hasi zen eta gaur egun, zortzi milioi desplazatu daude herrialdearen barruan. Gainera, sei milioi errefuxiatu mugimendu baino gehiago egon dira herrialdetik ihes egiteko. Guztira, ACNURek gogorarazi duenez, desplazatuen kopuru hori munduko hamalaugarren herrialde populatuenaren parekoa da.

Filippo Grandiren arabera, Ukrainako gerrak irudi «kezkagarri eta erakusgarria» bultzatu du eta «inoiz hautsi behar ez zen errekorra» izan da. Bide batez, honakoa adierazi du: «Ukrainan gerratik ihesi doazen pertsonei nazioarteak emandako erantzuna oso positiboa izan da. Errukiak bizirik jarraitzen duela erakutsi du».

Goi-komisarioaren hitzetan, ehun milioi desplazatu horiek «gatazka suntsitzaile horiek konpontzeko eta saihesteko, jazarpenarekin amaitzeko eta errugabeak etxetik ihes egitera behartzen dituzten azpiko kausei aurre egiteko ekintzarako deia izan behar dute».

«Antzeko mobilizazioa behar dugu munduko krisi guztietarako, baina, azken finean, laguntza humanitarioa aringarri bat da, ez da sendabidea», gaineratu du.

NBEko agentziak zehaztu duenez, datu horien artean errefuxiatuak eta asilo-eskatzaileak daude, bai eta gatazkaren ondorioz beren mugen barruan desplazatutako 53,2 milioi pertsonak ere, Barne Lekualdaketak Ikuskatzeko Zentroak (IDMC) berriki egindako txosten baten arabera.

Joera horri buelta emateko, Grandik uste du «erantzun bakarra bakea eta egonkortasuna direla, errugabeak ez daitezen behartuta egon etxeko arrisku larriaren edo ihes prekarioaren eta erbestearen arteko hautura».

ACNURek ekainaren 16an argitaratuko du urteko Joera Globalen Txostena. 2021erako lekualdatze behartuari buruzko munduko, nazioko eta eskualdeko datu multzo oso bat biltzen du honek, baita 2022ko apirilera arteko eguneratze mugatuagoak eta itzulerei eta konponbideei buruzko xehetasunak ere.