Aranzadi Zientzia Elkarteko boluntarioek, senideek eta hurbileko altzotarrek egurrezko kutxa handi eta astun batean zeuden Altzoko Handiaren gorpuzkiak jaso eta familiak hilerrian gordeta duen gunean lurperatu zituzten joan zen igandean. Orain, bere izena irakur daiteke jarritako hilarrian.

Asteazken honetan Aranzadik ohar baten bidez jakinarazi duenez, Zientzia Elkarteak bi urte hauetan zehar Zorroagako laborategietan zaindu ditu aztarna hauek.

2020ko abuztuaren 14an aurkitu ziren Altzoko Erraldoiaren gorpuzkiak. Bi egun lehenago, abuztuaren 12an, Aranzadi Zientzia Elkarteko 15 laguneko talde batek, Paco Etxeberria antropologoa buru zuela, familiaren hilobian hasi zuen jarduketa, baina ez zuen emaitza positiborik lortu.

Ondoren, hezurtegian bilatu zuten, eta han bai, aurkitu ziren, beste hezur batzuekin batera, baina ez pilatuta. Horrela, gorpuzkiak lurperatu zuten hilerrian zeudela egiaztatu zen eta irregularki lapurtuak izan zirelako kondaira faltsua zela frogatu zen.

Migel Joakin Eleizegi

Migel Joakin Eleizegi Ateagak (1818-1861), bere garaitik Altzoko Handia ezizenez ezagunagoa, gigantismo-gaixotasuna zuen, eta 2,40 zentimetroko altuera izatera iritsi zen. Bere heriotza aktak adierazten du Altzo Azpiko San Salbador Elizako hilerrian lurperatu zutela.

Istorio asko eta baita film bat ere sorrarazi dituen pertsonaia, ‘Handia’ pelikula, hain zuzen ere,  haren benetako historian oinarritua.