Arabako, Bizkaiko eta Gipuzkoako Foru Aldundiek herritarren eskura jarri dute ekainaren 25eko 11/2022 Errege Lege Dekretuan ezarritako 200 euroko zuzeneko laguntza eskatzeko izapidea, ohar batean azaldu dutenez.

Errege lege-dekretu horren bidez, kalteberatasun sozial eta ekonomikoko egoerei aurre egiteko neurriak hartzen dira. Laguntza hori behar bezala kudeatzeko, foru ogasunen bidez eskatuko da, ostiral honetatik, hau da, uztailaren 22tik aurrera, aldundi bakoitzaren egoitza elektronikoan eskuragarri egongo den formulario baten bidez.

Laguntza hori jasotzeko, onuradunek egoitza hiru herrialde hauetako udalerri batean izan behar dute, eta Errege Lege Dekretuan ezarritako baldintzak bete behar dituzte; hau da, bizikidetza unitatearen 2021eko errentak 14.000 eurotik beherakoa izan behar du, eta haren ondareak 43.196,4 eurotik beherakoa, ohiko etxebizitza kenduta. Soldatapeko langileei, autonomoei edo langabeei zuzenduta dagoenez, laguntza horretatik kanpo geratzen dira bizitzeko gutxieneko diru-sarrera, diru-sarrerak bermatzeko errenta edo Gizarte Segurantzaren edo Estatuko Klase Pasiboen araubide orokorreko eta araubide berezietako pentsioak jasotzen dituztenak.