![Hondarribiko arraunlariak, arraunak goian, Santurtziko banderako garaipena ospatzen, atzean Bizkaia zubia dutela.](/media/asset_publics/resources/000/920/345/article_main_landscape/Hondarribia_Santurtzi.jpg)
Igande honetako estropada bi bitxikerirekin hasi da. Lehena, atzoko estropada ostean jakin zen epaileek Cabok duela astebete jasotako zigorra –Aresekin gertatutako abordaiagatik– bertan behera utzi zutela eta, beraz, galiziarrek puntuak berreskuratu eta jaitsieratik urrundu dira proba hasi aurretik. Aresi, ordea, ez diote zigorra kendu. Beste nobedadea, berriz, proba beraren formatua izan da: lau luze izan ditu, baina hasierakoa eta amaierakoa besteak baino motzagoak izan dira. Hirugarren eta laugarren kaleak izan dira onenak estropada eremu honetan, eta bigarrena zailena.
Testuinguru honetan, Hondarribiak bikain aprobetxatu du hirugarren kalea eta, nahiz eta haizeak goraka egin lehen txandatik, hegan egin du garaipena eta Eusko Label Ligako lidergoa bakarka eskuratzeko. Ez hori bakarrik, Donostiarra, orain arte berarekin berdinduta zegoena, puntu batzuk galdu baititu hirugarren amaituta.
Beheko postuetan, Aresek amorruz ekin dio probari. Hainbestekoa zen amorrua, lehen txanda irabazi, marka onena egin eta puntu sorta lortu dituela. Ondarroari oso garrantzitsua izan daitekeen puntu batek ihes egin dio azken unean, Santurtzi bere aurretik helmugaratu baita.
Ohorezko txanda: Hondarribia nagusi hirugarren kaletik
Sendo hasi dira Hondarribia eta Donostiarra, hirugarren eta laugarren kaleetatik, baina bigarrengoek segundo batzuk galdu dituzte lehen ziabogan –Orio aurretik sartu da, "Ama Guadalupekoa" ontziaren denbora berean–. Hurrengo luzean, estropada guztian ikusi den maniobra bera egin dute: Urdaibai eta Orio ertz batera joan dira, eta Hondarribia eta Donostiarra bestera.
Aurreko txandan Zierbenari bigarren kaletik gertatu bezala –hau izan da estropadako kalerik zailena–, Oriok denbora asko galdu du luze honetan –8-9 segundo–, eta Hondarribiak ere tartea handitu ahal izan du Donostiarra eta Urdaibairekiko.
Hala, bigarren biraketan berdeak izan dira lehenak –dagoeneko Aresen marka hobetuz–, segundo bateko aldea ateraz Urdaibairi eta zazpi Donostiarra eta Oriori. Aukera bikaina zuten momentu honetan garaipena eta lidergoa bakarka lortzeko.
Luze horretan lidergoa mantentzea lortu dute, baina azken biraketan -arazoren bat izan dutela ikusi da telebistan– oso gertu izan dute Urdaibai. Ez da nahikoa izan, hortik amaiera arte erritmo bikaina mantendu baitute lider sendoa bihurtzeko. Donostiarra zein postutan amaituko zuen falta zitzaion jakitea, eta azkenean hirugarren izan da, Urdaibairen atzetik eta Orioren aurretik.
1. txanda: Ares, amorruz denborak apurtuz
Cabori ez bezala, Aresi ez diote zigorra kendu eta galiziarrak amorruz ekin diote estropadari hasieratik bukaera arte, txandako garaipena lortuz. Bigarren luzean argi eta garbi erakutsi dute lau traineruek uraren korrontea non dagoen estropada eremu honetan. Ondarroa zerogarren deritzon kalera joan da eta beste hiru traineruak, elkarren artean pegatuago zeudela, beste ertzera abiatu dira, erdiko kaleak garbi utziz.
Hala, bigarren ziabogan Ares izan da azkarrena, Santurtziri hiru segundo ateraz, Ondarroari lau eta Lekittarari zortzi. Hurrengo luzean galiziarrak hirugarren kalera abiatu dira argi eta garbi, Santurtziren kalera alegia.
Hirugarren ziaboga ostean, Ares –txanda kontrolpean zuela–, Santurtzi eta Lekittarra laugarren kalera abiatu dira argi eta garbi, eta Ondarroa, momentu horretan bigarren postuan zela, lehen kaletik egin du azken luze motza. Hori bai, azken momentuan ezin izan dio eutsi –etorkizunean puntuak oso ondo etorriko zaizkie ondarrutarrei– eta Santurtzi, etxeko banderan, aurretik helmugaratu da foto-finisharekin erabaki den helmugaratzean. Ondoren ikusiko zena jakin gabe, oso emaitza ona atera dute bi bizkaitarrek. Lekittarrak, ordea, asko sufritu du eta txandako laugarrena izan da.
2. txanda: Kaikuk ezin du Aresen denbora hobetu
Lehen txandan egindako maniobra bera egin dute hemengo lau traineruek bigarren luzean. Hau da, Getaria eta Zierbena, lehen eta bigarren kaletatik, ertz batetik egin dute luzea; eta Cabo eta Kaiku, hirugarren eta laugarrenetatik, beste aldetik, erdiko kaleak libre utziz. Lehen ziabogan, ordea, Zierbena eta Kaiku izan dira azkarrenak, baina lau ontziak segundo batean zeuden.
Bigarren luze horretan Zierbenak denbora galdu du, zazpi segundo, baina hurrengo biraketa egin aurretik zertxobait berreskuratu egin du. Dena den, Kaiku izan da azkarrena, 10:26ko denbora eginda. Arazo bat zuten momentu honetan, ez baitute aurreko txandan Aresek egindako marka hobetu (10:23).
Haizeak gora egin du nabarmen lehen txandatik bigarrenera, eta sufritu egin dute lau traineruek. Hirugarren ziabogan ez da erreakzioa iritsi eta kaiku Aresek egindako denboraren atzetik geratu da.
Azken luze motzean, Kaikuri ez dio denbora eman beste martxa bat sartzeko eta, nahiz eta txanda irabazi, ez du Aresen marka hobetu. Atzetik sartu dira, amaiera estu-estu batean, Cabo, Zierbena eta Getaria. Hala ere, Ares eta Kaikuren atzetik lehen txandako Santurtzi eta Ondarroa sartu dira estropadako sailkapenean.
XLIII. SANTURTZIKO IKURRINA
1. Hondarribia 20:01.61
2. Urdaibai 20:08.67
3. Donostiarra 20:13.85
4. Orio 20:14.69
5. Ares 20:20.22
6. Kaiku 20:24.66
7. Santurtzi 20:28.82
8. Ondarroa 20:30.28
9. Cabo 20:30.42
10. Zierbena 20:31.08
11. Getaria 20:31.64
12. Lekittarra 20:35.86
SAILKAPEN NAGUSIA
1. Hondarribia 88 puntu
2. Donostiarra 86
3. Urdaibai 83
4. Orio 78
5. Kaiku 52
6. Zierbena 48
7. Getaria 47
8. Santurtzi 32
9. Lekittarra 29
10. Cabo 28
11. Ares 26
12. Ondarroa 26
![Acdc](/media/asset_publics/resources/001/145/041/article_thumb_horizontal/ACDC.jpg)
AC/DC: El origen de una leyenda contada desde los márgenes
![Putin](/media/asset_publics/resources/001/142/722/article_thumb_horizontal/putin.jpg)
La Fiscalía presenta ahora su acusación formal contra Pablo González, liberado hace dos semanas
![Captura_de_pantalla_2024-08-14_a_las_20.40.52](/media/asset_publics/resources/001/146/475/article_thumb_horizontal/Captura_de_pantalla_2024-08-14_a_las_20.40.52.png)
Kaleko saltzaileen aurkako polizia-operazioa Bilboko Areatzan, Aste Nagusiaren atarian
![Donosti_maa4638](/media/asset_publics/resources/001/146/738/article_thumb_horizontal/donosti_MAA4638.jpg)
Herida de gravedad una joven al caer a las rocas desde el muelle de Donostia
![Lur](/media/asset_publics/resources/001/146/783/article_thumb_horizontal/lur.jpg)