Ilarduiako (Araba) La Leze gaztandegiak eskuratu du Ordiziako gazta txapelketaren 49. edizioko sari nagusia. Gazta erdia enkantean 9.600 euroan saldu da, eta Bodegas Mitartek eskuratu du.

Bigarren saria Aixtra (Nafarro) gaztandegiak jaso du eta hirugarrena, Ordiziako Joseba Insaustirentzat izan da.

Gazta irabazlea 14 finalistaren artean aukeratu du epaimahaiak: Angel Lizoain (Iraugi, Nafarroa), Beñat Egaña (Mutriku, Gipuzkoa), Ander Barandiara (Idiazabal, Gipuzkoa), Javier Muñoa (Zerain, Gipuzkoa), Ricardo Remiro (Eulate, Nafarroa), Marta Perez (Egozkue, Nafarroa), Jose Inazio Ugartemendia (Berastegi, Gipuzkoa), Joseba Insausti (Ordizia, Gipuzkoa), La Leze (Ilardui, Araba), Asier Sagasta (Eskoriatza, Gipuzkoa), Ipiñaburu (Ipiñaburu, Bizkaia), Olano (Eguino, Araba), Garoa (Zerain, Gipuzkoa) eta Aixtra (Araia, Araba). Sailkatuen artean bost izan dira gazta zuriak eta bederatzi ketuak. 14 finalistek diplomak jaso dituzte.

[EUS] Iarduiako La Leze gaztandegiek irabazi du aurtengo gazta lehiaketa. Gazta erdia enkantean 9.600 euroan saldu da, Bodegas Mitartek eskuratu du.
Zorionak irabazleei!#ordizia#biziherria pic.twitter.com/nnzvaihauE

— Ordiziako Udala (@Ordiziako_Udala) September 7, 2022

Gazta lehiaketaren 49. edizioa ospatzeaz gain, azoka ere egin da eta bertan fruta eta barazki, euskal oilo eta piriniar arrazako behi-azienda lehiaketak egin dira.

Arratsaldean profesionalen arteko pilota partidak izango dira eta ondoren herri kirol jaialdia. Udalak dei egin die ordiziarrei baserritar jantziarekin kalera atera daitezen.

Azken bi urteak azokarik gabe eta gazta txapelketa ateak itxita egin ondoren, iritsi da Ordiziako Euskal Jaien egitaraua bere osotasunean ospatzeko ordua. Horrela, aurten ekintza ugariz betetako astea izango dute Goierriko hiriburuan.

Egitarauak datorren ostiralean izango du jarraipena (irailak 9), antzerki emanaldi batekin. Larunbatean (irailak 10) 18 upategietako sagardo dastaketa egingo da eta gauean Huntza taldearen kontzertua izango da.

Iganderako, azkenik, Lazkao-Txiki bertsopaper lehiaketaren sari banaketa eta emakumeen Ordiziako Klasika txirrindulari lasterketaren lehenbiziko edizioa daude iragarrita.

Nekazaritza elkarteen protesta

Azokan egindako elkarretaratze baten bitartez, Aralarko abeltzainek eta ENBA eta EHNE nekazaritza elkarteek gogor kritikatu dute Enririo-Aralar Mankomunitateak larreak kudeatzeko martxan jarri nahi duen plan berria. «Ospatzeko ezer» ez dutela adierazi dute, eta Enirio-Aralar Mankomunitateko egungo errektoreen «utzikeria eta errespetu falta» salatu dute.

«Mendian bizi eta lan egiten duten abeltzainek behar dituzten gutxieneko inbertsioak eta ekipamenduak ukatzen dizkigute», deitoratu dute. Gainera, nabarmendu dutenez, udako lehorteak «erabateko gordintasunez erakutsi du mendian oraindik obra eta lan asko daudela egiteko, baldin eta natura-ondarea kontserbatu nahi bada».

Aralarko larreak kudeatzeko abeltzainek egindako lana balioan jarri ondoren, Mankomunitateko errektoreak «azken hamarkadetan egindako larreen kudeaketarekin amaitu nahi dutela» azpimarratu dute.