Europako Batzordeak ostegun honetan argitaratutako txosten baten arabera, espainiar Estatuak 3.396 milioi euro ordaintzeari utzi zion 2020an BEZaren iruzurragatik, hau da, balio erantsiaren gaineko zergaren bidez ekitaldi horretan bildu behar zuena baino %4,7 gutxiago.

Zehazki, espainiar Estatuak 69.382 milioi euro bildu zituen 2020an BEZari esker, baina zerga horrek 72.778 milioi euroko diru-sarrerak ekarri beharko zituen diru-kutxa publikoetara, iruzur fiskalagatik ez balitz.

Oro har, Europar Batasuneko herrialdeek 93.000 milioi euroko diru-sarrerak galdu zituzten BEZaren iruzurraren ondorioz2020an, hau da, urtebete lehenago baino 30.000 milioi gutxiago. Beherakada hau, Europako gobernuek koronabirusaren pandemiaren hedapena gelditzeko hartutako neurrien ondorioa da.

Espainiar Estatua diru-sarrerak gutxien galdu dituen EBeko seigarren kidea da, Finlandiaren (%1,3), Estoniaren (%1,8), Suediaren (%2), Herbehereen (%2,8) eta Letoniaren (%3,6) atzetik. Beste muturrean daude Errumania (%35,7), Malta (%24,1) eta Italia (%20,8). Baina Italia kopuru absolutuetan diru-sarreren galera handienen sailkapenaren buruan dago (26.000 milioi).

Europak nabarmendu du honek «premiazko arazoa» dela, batez ere «gobernuek diru-sarrera iraunkorrak behar dituzten une honetan, egungo ziurgabetasun ekonomikoari aurre egiten laguntzeko».

«Herritarrek justizia fiskala eta iruzurraren eta zerga-ihesaren aurkako ekintza irmoak eskatzen dizkigute», azpimarratu du Paolo Gentiloni Ekonomia komisarioak prentsaurrekoan, zerga horrekin iruzurrari aurre egiteko hainbat lege-proposamen bat azalduz.