Iruñeko Udalak Labriteko pasabidean egindako konponketa lanengatik 59.371,8 euro gehiago ordaintzeari argi berdea eman dio astearte honetan. EH Bilduren ustez, «desbideratze berri honek bi gai argi berretsi ditu: lehenik eta behin, hondamendia konfirmatzen duten gainkostuak eta iragarritakoa hirukoizten duten epeak biltzen dituen espedientearen kudeaketaren lardaskeria, eta, bestetik, azpiegitura horren ruina izaera, izan ere, 2010ean egin behar ziren soldadura lanak egin behar izan dira orain gainkoste berri batekin».

Gainkostuei dagokienez, koalizio soberanistak nabarmendu du «obretan bakarrik % 36,34 garestitu direla, eta horrek agerian uzten du zaldaina diseinatu zutenen ezintasuna, baina baita proiektua sinatu duenaren arduragabekeria ere, eta, batez ere, gobernu talde baten kudeaketa zakarra».

Errefortzu-obrak 593.000 euroko kostua izango zuela iragarri zuen Iruñeko Udalak, baina dagoeneko 215.000 euro gehiago ordaindu behar izan dira. «Okerrena da oraindik ez dakigula diru xahutze hau noiz geldituko den. Kopuru horiei aldamioen gain-kostuak, eskatutako txosten teknikoak (bai aurreko legegintzaldian, bai honetan) eta obra zuzendaritzaren honorarioak gehitu behar zaizkie. Guztira, kontua 1,25 milioi eurora hurbiltzen ari da azpiegitura txapuzero bat konpontzeko obran. Jatorrizko kostua 680.000 eurokoa izan zen», azaldu du Iruñeko EH Bilduk.

Gastuaren desbideratzeaz gain, «oso larritzat» jo du konponketa epeetan izan den akatsa. «Proiektuak 105 egunetan finkatzen zuen amaitzeko epea, eta oraingoz 300 egun daramatza, iragarri zena baino 195 egun gehiago».

«Iruindar guztion artean ordaindu dugu lardaskeria honen partxeoan kostatu zenaren ia bikoitza eta iragarritakoa ia hirukoizten duen aldian. Baina hori larria izanik, are larriagoa da proiektua politikoki bultzatu zuenaren erantzukizuna estaltzeko egiten ari direla; izan ere, proiektua azkar eta korrika inauguratzea onartu zuenarena eta erabaki horiekin herritarrak arriskuan jarri dituenarena. Bide guztiek izen batera eta bere gobernu taldera eramaten gaitu», zehaztu du koalizio abertzaleak.