Polizia espainiarrak Irungo kalamu elkarte bateko presidenteak eta idazkariak osatutako zuzendaritza batzordea atxilotu du, legez kanpoko elkarte bateko eta osasun publikoaren aurkako ustezko delituak egotzita. Operazioa iragan astean gauzatu bazen ere, ostegun honetan eman dute aditzera.

Ikerketak joan den udan hasi ziren, ikertzaileek antzeman zutenean elkartea ez zutela bazkideek bakarrik bisitatzen, baita substantzia estupefazienteak erostera joaten ziren hirugarren pertsonek ere.

Ikerketan zehar, agenteek 12 pertsona atzeman zituzten, bazkide izan ez arren, lokalean marihuana edo haxixa erosi zutenak, eta, ondoren, droga beste leku batean kontsumitu zutenak, kanpoko pertsonekin.

Ikertutakoaren arabera, kalamu elkartearen arduradunek zilegi ez den elkartze-delitu bat eta osasun publikoaren aurkako beste delitu bat egin zezaketenaren zantzuak identifikatu zituen poliziak; izan ere, «elkarte hori legez eratu eta erregistratu bazen ere», diote iturri berberek, elkartearen funtzionamendua «ez zetorren bat» elkartearekin lotura ez duten pertsonen artean legez kanpoko droga toxikoak edo estupefazienteak kontsumitzea sustatu, lagundu eta erraztean aldarrikatzen duten helburuarekin, «substantzia horiekiko mendekotasuna dutenen artean, esaterako».

Horregatik guztiagatik, iragan abenduaren 28an, Polizia espainiarrak bi ikertuak atxilotu zituen Irunen. Operazioaren baitan, elkartearen egoitza miatu zuten. Bertan, «kontsumorako prest» zeuden kilo bat marihuana kukulu baino gehiago, 300 gramo haxix baino gehiago eta haxixa egiteko erabiltzen zen prentsa hidrauliko bat konfiskatu zituzten.