Pedro Sanchez espainiar Gobernuko presidenteak iragarri du Ministroen Kontseiluak datorren asteartean onartuko duela lanbide arteko gutxieneko soldata (LGS) 1.080 eurora igotzea, eta «koherentzia» eta «erantzukizuna» eskatu dizkio patronalari.

«Ezin zaie behekoei soldata sakrifiziorik eskatu, goikoentzat festa bat dagoen bitartean», azpimarratu du Sanchezek Malagan, Juan Espadas PSOEren Andaluziako idazkari nagusiarekin eta Dani Perez Malagako alkategaiarekin batera. 1.500 pertsona inguru bertaratu dira Malagako idazkariaren hautagaitza aurkezteko egin den ekitaldira, alderdiaren datuen arabera.

Madrilgo Gobernuburuaren arabera, «ezin da neurtzeko makila bikoitzik egon, bat ohiko herritarrentzat eta beste bat gutxiengo elitistarentzat». Eta ohartarazi du «ez dela inbutuaren legerik egongo, oso zabala gehiengoarentzat eta oso estua gutxiengoarentzat».

Adierazi du egoera hobetzeko eta «langileen soldata igo ahal izateko» enpresariak «sindikatuekin esertzea» beharrezkoa dela.

Kritikatu egin du eskuinak espainiar ongizate estatua «neurriz kanpo» dagoela esan izana, eta gogorarazi du askok ez dutela bizitzeko oinarrizko baliabiderik. Horregatik, ongizate estatua indartzen jarraitzearen alde agertu da, LGSren igoerarekin esate baterako. PSOEren Gobernuak «langileekiko konpromisoa» betetzen jarraituko duela adierazi du, «lan erreformarekin egin bezala».