CIC bioGUNE ikerketa zentroko langileek Derioko Bizkaiko Parke Teknologikoan duen egoitzaren aurrean bildu dira ostiral honetan «pairatzen ari den soldata egoera agerian uzteko eta ikerketarako finantzaketa egokiagoa» eskatzeko, Lakuako Gobernuko Teknologia, Berrikuntza eta Eraldaketa Digitaleko sailburuorde Estibaliz Hernaezen bisita aprobetxatuz.

Lakuako Gobernuaren funts lehiakorrak, CIC bioGUNEren aurrekontu osoaren zati handi bat osatzen dutenak, 2023an %15 inguru jaitsi dira, «nahiz eta zentroak balorazio positiboa jaso duen eta urtez urte hobetzen ari den arren». Zuzendaritzaren arabera, murrizketa horrek eragotzi egin du soldatak egungo egoera ekonomikora egokitzeko neurriak aplikatzea; aurreko urteetako jarrera mantenduz. Gainera, zuzendaritzak adierazi du ez duela ziurtasunik etorkizun hurbilean soldata horiek konpentsatzeko.

«CIC bioGUNEren jarduera, berriz ere Severo Ochoa bikaintasun programan egiaztatua, ikerketa biomedikoan estatuan eta nazioartean erreferentea da, eta gure erakundeek harro erakusten dituzte haren ekarpenak. Hala ere, eskatzen zaigun lehiakortasuna gero eta handiagoa den bitartean, ez dira aintzat hartzen langileon prestakuntza, esperientzia eta dedikazioa, azken urteotan erosahalmenaren etengabeko txikiagotzea jasan baitute», salatu dute.

CIC bioGUNEko Enpresa Batzordeak zuzendaritzari jakinarazi dio oro har «ondoeza» dagoela, «errekonozimendu faltagatik eta aurten proposatutako soldata igoerak ez onartzeagatik». %4.5eko igoera soilik plantillaren %40ari aplikatuko litzaioke; hau da, CIC bioGUNEk zuzenean ordaindutako langileei bideratua.

«Neurri horrek ez du konpentsatzen erosteko ahalmenaren galera, eta alde batera uzten ditu kanpoko erakundeek ordaindutako langileak, horien soldatak zuzenean hainbat erakunderen mende baitaude», kritikatu du batzordeak. Langileek egoera hori arintzeko premiazko neurrien beharra azpimarratu dute.

«Zuzendaritzak bere burua aldarrikapen horiei erantzuteko gai ez dela adierazi duenez», langileek hainbat lanuzte egiteko deialdia egin dute «egoera ikusarazteko», «konpromisoak lortzeko» eta Lakuako Gobernuari eta gainerako erakundeei beren «zientzialarien soldata duintasuna bermatzeko».