SOS Arrazakeria Gipuzkoak eta Zehar Errefuxiatuekin elkarteak ‘Izan Harrera’ kanpainaren 4. edizioa aurkeztu dute ostegun honetan. Mentoretza soziala sustatzea da proiektu honen helburua, errefuxiatuekin eta, aurten lehen aldiz, migratzaileekin, haien administrazio egoera edo nazioarteko babesa edozein dela ere.

Donostiako Koldo Mitxelena Kulturunean egindako aurkezpenean, elkarteko ordezkariek azaldu dute ‘Izan Harrera’ proiektuaren 4. edizioa nola egingo den. Bertan Silvana Luciani SOS Arrazakeriaren kideak, Libe Madinabeitia Zehar Errefuxiatuekin ordezkariak, Alberto Ariño egungo mentoreak, Iñaki Olaetxea aurreneko edizioan mentore izandakoak eta Xabier Vicente Laszlo ekoiztetxeko zuzendariak hartu dute parte.

Boluntarioekin batera eratutako bikoteetatik abiatuta, laguntza, gida eta akonpainamendu prozesu bat ezartzen da, denbora jakin bateko harreman batetik abiatuta, aholkulariak harrera gizartean egokitzapena erraztu dezan, pertsona horren garapen pertsonala eta soziala errazagoa izan dadin. Aurten, ‘Uste baino gauza komun gehiago ditugu’ lelopean, herritarrak gonbidatu dituzte urratsa ematera eta boluntariotza egitera, harrera eginez.

Proiektu honen helburua errefuxiatuak, asilo-eskatzaileak edo migratzaileak gizarteratzeko aukerak hobetzea da, lagun egitearen bidez. Zerbitzuak, praktikoki eta borondatez, mentoreen parte-hartze jarraitua eskatzen du.

Joan den martxoaren 20an, Laszlo Hace ekoiztetxeak Tabakaleraren eraikinean egindako Izan Harrera lanaren 4. edizioaren aurkezpen bideoa filmatu zen. Filmaketak hamabi protagonista izan zituen, hainbat mentore eta mentoretza soziala jaso zuten lagunen ordezkari gisa.

Ostegun honetan ere hasi da Laszlok diseinatutako kanpaina, zazpi bideo eta formatu desberdinetako material grafikoa biltzen dituena. Lehenengo piezak proiektuan parte hartzen duten entitateek eskaintzen duten mentoretzaren eta filosofiaren funtsa atzematea lortu du, aisia ardatz hartuta, elkar hobeto ezagutzeko tresna eraldatzaile gisa, harrera erreala erraztuko duten loturak ezartzeko eta gizartean aurreiritziak eta estereotipoak hausteko.