Iruñeko Hotelen Elkarteak, San Fermin jaiak hasteko hiru aste falta diren honetan, okupazioaren aurreikuspen «bikaina» egin du egun guztietarako eta %90erainokoa lehenengo bi egunetan, uztailaren 6an eta 7an.

Ohar batean azaldu dutenez, Elkarteak (Iruñeko erdigunean zein eskualde osoan dauden 26 hotelek osatzen dute, eta guztira 1.800 logela eta 3.000 ohe dituzte) %90eko okupazioa aurreikusten du uztailaren 6an eta 7an, %83,75eko batez bestekoa 6tik 9ra bitartean, eta %73ra jaitsiko omen da uztailaren 10etik 14ra.

Erdigunean kokatutako hotelek %80ko batez besteko okupazioa aurreikusten dute uztailaren 6tik 14ra, eta %85 egun jendetsuenetan, uztailaren 6tik 9ra bitartean, alegia. Bestalde, eskualdeko hotelek %70eko okupazioa aurreikusten dute uztailaren 6tik 14ra, jaietako lehen egunetan %81eko igoerarekin.

Bezeroen jatorriak San Fermin jaien nazioarteko erakargarritasuna islatzen du, eta, beraz, oreka dago Estatu mailako bidaiarien (%49) eta espainiar Estatutik kanpokoak direnen (%51) artean, azken kasu horretan batez ere AEBetatik, Estatu frantsesetik, Alemaniatik, Mexikotik, Italiatik eta Irlandatik datozen bidaiariak direlarik.

Hirigunean kokatutako hotelek batez beste %80ko okupazioa aurreikusten dute jaiegun guztietan, eta %85eko okupazioa aurreikusten da uztailaren 6tik 9ra bitarteko egun jendetsuenetan.

Bestalde, eremu periferikoetan kokatutako hotelek %70eko okupazioa aurreikusten dute guztira, eta jaietako lehen egunetan %81eko igoera izango delakoan daude.