Badatoz San Bartolome jaiak eta Gipuzkoako Elgoibar eta Ibarra herrietan gogotsu ospatuko dituzte.

Elgoibarrek 70 jarduera izango ditu bertakoek zein bisitariek gozatzeko, abuztuaren 23tik 28ra. Aurtengo jaien egitaraua herritarrekin eta tokiko eragileekin elkarlanean diseinatu du Elgoibarko Udalak, adin eta gustu guztientzako esperientziak izateko asmoz: Kultur eta kirol ekitaldiak, kontzertuak... jai giroa izango dute herriko txoko guztietan. Jaien hasiera ofiziala abuztuaren 23an izango da, San Bartolome bezperan. Hain zuzen, Haritz Euskal Dantzari Taldeak jaurtiko du txupina, 13:00etan, 50. urteurrena duela eta. Ondoren, Mauxitxa txarangaren eskutik izango da kalejira.

Bultzada berezia eman nahi izan diote aurtengo Larrain Dantzari Elgoibarren, eta zabaltzeko asmoz, Larrain Dantza ikasi nahi duten herritar eta bisitari guztientzat tutoretza-bideoa sortu du Elgoibarko Udalak. Hain zuzen, abuztuaren 23an, jaiei hasiera ematen dien txupinazoaren aurretik egingo dute dantza, eta nahi duten guztiek gozatu eta parte hartu ahal izatea da helburua. Tutoretza-bideoa ikusgai dago Udalaren webgunean (www.elgoibar.eus), baita bere sare sozialetan ere.

Maialen Gurrutxaga Elgoibarko alkateak hala nabarmendu du: «Dantza tradizionaletan adituak direnek gidatuta, ikusleek jarraibide zehatzak jarraitu eta etxeko erosotasunetik praktikatzeko aukera izango dute». Larrain Dantza herrian urtez urte finkatu duten jarduera da: «Jaietako lehen eguneko funtsezko zati bihurtu da, eta guztiok parte hartzeko eta gure tradizioa bizirik mantentzeko aukera izatea ziurtatu nahi dugu». Ingurutxoa eta jota oinarri dituen suitea da Larrain Dantza. Zirkulu ireki handi bat osatzen duten bikoteetan dantzatzen da, eta erloju-orratzen kontrako noranzkoan mugitzen dira dantzariak.

Bestalde, Kalegoen plazan izango dira kontzertu nagusiak: ETS, Tapia eta Leturia, Brilet, Neomak, Muzak eta Su ta Gar. Rockalean taldea eta Santiagoko Deabruak ikuskizuna ibiliko dira herriko kaleetan, San Bartolome egunean, eta bestelako kale animazioa ere izango da egunero.

Elgoibarko establezimendu laguntzaileak: Lanbroa taberna eta Milar Bire.

Ibarra ere jaietan

Ibarran, Tolosaldearen muinean, abuztuaren 23tik 27ra ospatuko dituzte jaiak. Hemen ere San Bartolome bezperan hasiko dute ospakizuna ofizialki, 12:00etan. Behin txupina botata, Ibarrako erraldoi eta buruhandien konpartsa herrian ibiliko da, gazte kuadrillekin batera, kalejiran. Hortik aurrera, jarduera mordoa izango dituzte jaietan: danborradak, azokak, zezen suzkoa, bertso saioa, dj-ak, txekor-jatea...

Musika emanaldiei dagokienez, San Bartolome plazan izango dira Zopilotes Txirriaos, Laket, Iratzar eta Muxutruk, gaueko giroa mugitzen. 

Aipatzekoa da «Prudentxi eta Ziriako» antzezlana prestatu dutela herritarrek, XVIII. mendearen erdialdean kokatzen den istorioa, eta abuztuaren 25ean antzeztuko dute. Ibarrako mutil gazte baten eta Elduaingo emakume ezkondu baten arteko harremana kontatuko dute, herrian egonezina sortu eta epaitu egingo dituztelarik. Lau ataletan banatuko dute kontakizuna, eta tartean dantza eta abestiak izango dira. Idoiagako plazan jarri dute hitzordua 11:00etan, hamaiketakoa egiteko, eta ondoren, Danon Txokoaren aurrean izango da lehen geldialdia. Herritarrak antzinako jantziekin janztera gonbidatu dituzte, ikuskizunaz gozatzeko.