Giza Eskubideen Europako Auzitegiak Lituania zigortu du astearte honetan, CIAK Baltikoko herrialde horretan duen espetxe sekretu batean torturatu zuten eta egun oraindik ere epaiketa zain Guantanamon preso daukaten Saudi Arabiako herritar baten kasuaren harira.

Auzitegi paneuroparrak uste du Vilnak Giza Eskubideen Europako Hitzarmenaren zenbait artikulu urratu zituela, bereziki 2. (bizitzeko eskubidea) eta 3. (torturaren debekua) artikuluak.

Mustafa al-Hawsawi, 1968an jaioa, 2003an atxilotu zuten Pakistanen. Estatu Batuek uste zuten saudiarabiarrak 2001eko irailaren 11ko atentatuetan parte hartu zuela. Gaur egun Guantanamoko basean, Kuban, preso daukaten gizona 2005ean CIAk Lituanian duen ezkutuko atxilotze zentro batera eraman zutela adierazi du, Estrasburgoko Auzitegiak nabarmendu duenez.

Ameriketako Estatu Batuetako inteligentzia zerbitzuak espetxeak sortu zituen hainbat herrialdetan (tartean Polonia, Lituania, Errumania, Afganistan, Thailandia), George W. Bush errepublikanoaren lehendakaritzan, «terrorismoaren aurkako gerraren» hasieran, irailaren 11aren ondoren.

Estrasburgon egoitza duen Europako gorteak AEBetako Senatuak 2014an argitaratutako txosten bat du oinarri, «CIAk egindako torturaren erabilerari buruzkoa», eta horrek Al-Hawsawiren testigantza berretsiko luke.

Auzitegiak baloratutako elementuen arabera, zentro hori Lituanian aritu zen 2005 eta 2006 artean.

Lituania antzeko kasu batean kondenatu zuten 2018an, eta Gobernuak beti ukatu izan du bere lurraldean zentro hori dagoenik.

Europako magistratuek «ikerketa penal sakona» egiteko eskatu diete Lituaniako agintariei. Bertako Justizia Ministerioko bozeramaileak adierazi duenez, herrialdeak errespetatu egingo du Giza Eskubideen Europako Auzitegiaren erabaki hau ere, kalte moralengatik 100.000 euro  ordaintzeko kondena ezartzen duena.