Marcelo Rebelo de Sousa Portugalgo presidenteak lehen ministro izendatu eta berehala eginiko agerraldi labur batean jakinarazi du Luis Montenegro kontserbadoreak bere Gobernuak apirilaren 2an hartuko duela kargua, nahiz eta martxoaren 28an jakingo den nortzuk diren aukeratutakoak.

Hasiera batean, ez zen espero estatuburuak lehen ministro bat izendatzea ostiralera arte, ordurako baitzegoen aurreikusita iragan martxoaren 10eko bozen behin betiko emaitzak Errepublikaren Egunkarian argitaratzea, baina Rebelo de Sousak prozesua aurreratzea erabaki du, azalpenik eman gabe.

Presa honi erreferentzia egin dio, hain zuzen, Montenegrok eta azaldu du agintariarentzat garrantzitsua zela ahalik eta azkarren lehen ministroa izendatzea, bozetan garaile atera zen AD Aliantza Demokratikoa koalizioko buruak Bruselara bidaia bat egin behar duelako.

«Europako Batzordeko presidentearekin [Ursula von Der Leyen] eta Europako Alderdi Popularra osatzen duten alderdi politikoetako buruzagiekin bilera bat izango dut», esan du Montenegrok.

«Beraz, ezinezkoa zen goizean hemen egotea eta, aldi berean, bilera horietan parte hartzea», gianeratu du.

Presidentetzaren webguneak Montenegroren izendapenaren berri eman zuen atzerriko botoen zenbaketaren emaitza oraindik iragarri gabe zegoenean. Parlamentuko 230 eserlekuetatik lau esleitzen zituzten.

Zenbaketa amaituta, Chega alderdi ultraeskuindarrak bi eserleku eskuratu ditu, ADk bat eta Alderdi Sozialistak (PS) beste bat.

Horrela, ADk irabazi ditu hauteskundeak 80 diputaturekin, PSk 78 lortu ditu eta Chegak, 50.

Alderdi batek ere ez du lortu Asanblea osatzen duten 230 diputatuetatik 116k ematen duten gehiengo absolutua, eta, beraz, Montenegrok gutxiengo Gobernua izango du, eta une honetan airean geratuko da Iniciativa Liberal alderdiak (zortzi eserleku dituena) Ministroen Kontseiluan presentzia izango ote duen.

Chega kabineteko kide izateko prest agertu da, eta Andre Ventura buruzagiak adierazi du «gehiengo handia» ezin dela alferrik galdu "«goa edo harrokeria» direla-eta, PSDko buruzagiaren isiltasunari eta ultraeskuinarekin egindako edozein akordioren aurkako estrategiari erantzunez.