EH Bilduren batzarkide taldeak Arabako Batzar Nagusietako Kontroleko Osoko Bilkuran, apirilaren 12an, interpelazioa aurkeztuko du herrialdeko udalerri guztietan etxez etxeko zerbitzuari eustea eskatzeko, Arabako landa eremuan menpekotasun gradurik ez duten 150 pertsonei ukatu zaie eta.

Hala azaldu du Eva Lopez de Arroyabe batzarkide taldearen bozeramaileak asteazken honetan Txelo Auzmendi Asparrenako alkatearekin eta Unai Gutierrez Zuiako alkatearekin batera emandako prentsaurrekoan.

Bertan zehaztu dutenez, 2023ko uztailean argitaratutako Errege Dekretu batek gradua aitortuta duten pertsonentzat etxez etxeko zerbitzua hobetzen du, baina gradurik ez dutenentzat ez da eskainiko orain arte ematen zen hiru orduko laguntza. Horixe agintzen zuen Arabako Foru Aldundiak landa eremuko herrietarako emandako instrukzio batek, Gasteizen aplikatzen ez dena.

Lopez de Arroyaberentzat laguntza zerbitzu hau «asistentzia eta prebentzio zerbitzua da, pertsonei etxean bertan moldatzeko eta ingurune komunitarioan integratzeko aukera ematen diena, batzuetan egoitza batean sartzea saihestuz».

«Diskriminazioa»

«Gero eta jende gutxiago bizi den eta gero eta zerbitzu gehiago kentzen diren landa eremuan» 150 pertsona baino gehiagori ukatu zaie, 72 Lautadan, 29 Gorbeialdean eta 10 baino gehiago Urkabustaizen, EH Bilduk jasotako datuen arabera.

Lopez de Arroyaberen esanetan, «landa eremuan bizi diren pertsonek jasaten duten diskriminazioa agerikoa da eta uste dugu hori aldatu egin behar dela». «Onartezina da, mendekotasuna duten pertsonen bizitza hobetu nahi duen dekretu batean oinarrituta, Foru Aldundiak orain arte bermatutako eskubideak murrizteko aprobetxatzea», gaineratu du agerraldian.

Mozioak

Beraz, EH Bilduk mozioak aurkeztu ditu ordezkaritza duen herri guztietan, baita Batzar Nagusietan ere. Foru Aldundiaren instrukzioa bertan behera uztea eta zerbitzu horri eustea eskatzen da. Bastidan eta Agurainen onartu dute eta datozen asteetan beste udalerrietan eztabaidatuko dute.

«EH Bildun uste dugu, despopulazioaren aurkako estrategia eraginkorra izateko, Arabako herrietan bizi eta herriak biziarazten dituzten pertsonei mota guztietako zerbitzuak eta azpiegiturak eman behar zaizkiela. Eta gizarte zerbitzuek funtsezko garrantzia dute, batez ere prebentziokoek, 0 mailako etxez etxeko laguntza zerbitzua bezalakoek, adibidez. Pertsonak ingurunean errotuta mantentzeko modu bat delako, egoitza batera joan beharrik gabe», amaitu du Eva Lopez de Arroyabek.