Euskal Herriko zazpi lurraldeak ordezkatuta egon dira asteburu honetan Bidarten, zesta-puntaren bitartez eta, are gehiago, ‘pilotari ttikien’ bitartez. Urtero egiten diren topaketak dira, txoko ezberdinetako pilotari gazteen arteko sarea sendotzea helburu eta aurten, 25. ekitaldian, inoizko parte-hartzaileena izan da. Orotara, 7 eta 12 urteko 250 neska-mutil elkartu dira, bakoitza bere xistera eta kaskoarekin.

Hain jendetsua izan da aurtengo hitzordua, bi egunetan banatu behar izan dituztela partidak. Larunbat eta igandean jokatu dira eta bikoteka osatu dituzte kinielak.

Ezbairik gabe, zesta-punta profesionala olatu aparrean baldin badago, honek eragina dauka zesta-eskoletan ere. Gazteentzako beharrezkoak dira erreferenteak eta era berean, zesta-puntak etorkizuna izateko ezinbestekoa da harrobia. Hala, asteburu honetan, bi faktoreak elkartu dira Bidarten, txikienekin batera ikusi baitira, besteak beste, Aritz Erkiaga, Thibault Basque, Unai Lekerika edo duela urtebete erretiratu zen Diego Beaskoetxea.

Guztira, Euskal Herriko zazpi lurraldeetako zein Landak, Biarno, Zilarraren kostaldea eta Okzitaniako 23 zesta eskolako haurrak bertaratu dira Bidartera. Arabatik, Gasteizkoak; Bizkaitik, Lekeitio, Gernika, Markina-Xemein, Berriatua eta Durangokoak; Gipuzkoatik, Hondarribia, Donostia, Andoain, Tolosa eta Mutrikukoak; Nafarroa Garaitik, Noain, Cabanillas eta Berriozarkoak; Nafarroa Beheretik, Garazikoak; Lapurditik, Donibane Lohizune, Getaria eta Bidartekoak; Zuberoatik, Maulekoak; eta Estatu frantsesetik, Hossegor, Paue, Arcachon eta Okzitaniako Pamiers-ekoak.