![Uztailaren 1etik 26ra bitartean, haurrek modu osasungarrian parte hartuko dute Barakaldon, Bilbon eta Gasteizen egingo diren kirol, aisialdi eta kultura jardueretan.](/media/asset_publics/resources/001/134/130/article_main_landscape/Save_children.jpg)
Save the Childrenen udalekuek familia eta lana uztartzea eta aisialdiko eta kulturako jarduerak, elikadura ohitura onak, laguntza emozionala eta hezkuntza errefortzua sustatu nahi dituzte. Izan ere, Bizi Baldintzen Inkestaren (BBI) arabera, haurrak dituzten Araba, Bizkai eta Gipuzkoako etxeen %22k ezin dute oporretara edo udalekuetara joan.
Jarduera horien kostu handiak ez du laguntzen; izan ere, haur bat hazteko urteko gastuaren %20 izan daitekeela kalkulatu du erakundeak. Hau da, hilean 1.930 euro jasotzen dituen bi heldu eta bi seme-alaba dituen familia batek 500 euro inguru bideratu beharko lituzke bien udalekuetarako. Kontuan hartuta EAEn hileko kostua 769 euro ingurukoa dela seme-alaba bakoitzeko, milaka familiak ezin dute jarduera horietan parte hartu.
«Udalekuetako gastuak murrizten lehenetarikoak dira muga ekonomikoak dituzten familientzat, eta horrek eragin handia du haurren ongizatean eta garapen osasungarrian uda garaian. Familia horiek lana eta familia uztartzeko orduan ere ondorioak ditu, eta lan prekaritatearen zirkuluak iraunarazten ditu», adierazi du Charo Arranz Save the Children Euskadiko zuzendariak.
Telelana eta sareak
Erakundearen esanetan, eskolarik gabeko aldietan, telelana eta familia laguntzeko sareak lagungarriak dira familiek kontziliatu ahal izateko. Hala ere, zaurgarrienen artean, telelan gutxiago egiten da. Horietako askok zerbitzuen sektorean egiten dute lan. Gainera, gehienek ez dute laguntza sarerik, batez ere ama bakarra duten familietan.
Egoera horren aitzinean, Save the Childrenek udalekuak jarri ditu abian beste urte batez, pobrezia eta gizarte bazterketa egoeran dauden 3 eta 17 urte bitarteko 2.400 haur eta nerabe baino gehiagorentzat. Horietatik 380k Barakaldoko Haur eta Nerabeentzako Baliabide Zentroan (CRIA) antolatutako guneetan parte hartuko dute, Udalaren laguntzarekin, baita Bilbon eta Gasteizen ere, Bakuva elkartearekin eta Gasteizko Udalarekin batera.
Esku-hartzea indartu du
Save the Childrenek bere esku-hartzea indartu du eragin politikoa izango duen agenda batekin, bere proposamenak udalei aurkeztuz eta erakundeei plazak eta laguntzak ziurta ditzatela eskatuz hezkuntza errefortzu, kirol eta aisialdi hezitzaileko jardueretarako. Laguntza horiek ekipamendua eta garraioa ordaindu behar dituzte, familiek funtsezko zerbitzu horiek eskura ditzaten bermatuz.
«Asko gustatzen zait udalekuetara etortzea, batez ere hondartzara joatea», esan du Lucasek, Barakaldoko udalekuetan dabilen 11 urteko haurrak.
Hiri honetan prestatu den programazioaren ardatz nagusia Garapen Jasangarrirako Helburuak (GJH) eguneroko jardueretan txertatzea da.
Nekane Marañon Barakaldoko Save the Childreneko Haur eta Nerabeentzako Baliabideen Zentroko koordinatzaileak azaldu duenez, garapen jasangarrirako helburuak beste era batera landuko dituzte. Bideo joko bizi baten bidez, hainbat jarduera egingo dituzte, egunero helburu bati helduz.
Save the Childrenen udako kanpaina La Caixa Fundazioarekin lankidetzan egiten da. Barakaldoko Udalaren eta Gasteizko Udalaren babesa ere badu.
![Putin](/media/asset_publics/resources/001/142/722/article_thumb_horizontal/putin.jpg)
La Fiscalía presenta ahora su acusación formal contra Pablo González, liberado hace dos semanas
![Captura_de_pantalla_2024-08-14_a_las_20.40.52](/media/asset_publics/resources/001/146/475/article_thumb_horizontal/Captura_de_pantalla_2024-08-14_a_las_20.40.52.png)
Kaleko saltzaileen aurkako polizia-operazioa Bilboko Areatzan, Aste Nagusiaren atarian
![Donosti_maa4638](/media/asset_publics/resources/001/146/738/article_thumb_horizontal/donosti_MAA4638.jpg)
Herida de gravedad una joven al caer a las rocas desde el muelle de Donostia
![Lur](/media/asset_publics/resources/001/146/783/article_thumb_horizontal/lur.jpg)
Konexioa ezarri dute Lur-1ekin, orbitan jarri duten «lehen euskal satelitearekin»
![Captura_de_pantalla_2024-08-17_a_las_20.44.31](/media/asset_publics/resources/001/147/184/article_thumb_horizontal/Captura_de_pantalla_2024-08-17_a_las_20.44.31.png)