Hau ez da normala. Ernesto Valverderen aurpegia ikustea besterik ez zen egin behar. Nolakoak diren gauzak. Athleticek 2-1 galdu du Gironan, azken momentuan penaltiz jasotako gol batekin, baina, hori bai, partida berean hiru penaltietan huts egin ostean. Egia da Gazzaniga atezainak ardura handia izan duela hiru jaurtiketa horietan, baina zuri-gorriek konjuru negatiboren bat dutela pentsa lezake norbaitek.

Berenguer eta Iñaki Williamsek aukera ederra bana izan dute, baina bereziki bigarren honek oso gaizki jaurti du erdira eta ezin izan dute gola egin. Bigarren penalti hau, gainera, errepikatu behar izan da atezaina aurreratu delako. Baina Ander Herrerak ez zuen eguna ezta ere. Stuanik, ordea, 99an ez du hutsik egin eta garaipena eman dio Gironari. Ligan geldialdia dagoela ikusita, datorren asteak onak izan daitezke Athleticentzat penaltiak praktikatzeko...

Bi taldeek Europa zuten oraindik buruan: Gironak asteazkenean jokaturiko Txapeldunen Liga, eta Athleticek osteguneko Europa League. Baina gaurkoa Liga zen, eta entrenatzaileek ondo zekiten. Ernesto Valverdek aldaketa batzuk egin ditu hamaikakoan: Alex Padilla atezaina Agirrezabalaren ordez sartu da, De Marcos Gorosabelengatik, Adama Boiro Yurirengatik, Ander Herrera Jauregizarrengatik eta lehen zatian protagonismo handia izan duen Berenguer lesionaturiko Nico Williamsengatik.

Michel Gironako prestatzaileak beste aldaketa batzuk egin ditu ere, baina, nahiz eta bere jokalariek kalitate handia erakutsi zelaiko hiru laurdenetan –Asprilla ondo aritu da, nahiz eta gauzak presa askorekin egin–, bere taldeari Europan defentsan ikusitako dudak berriro nabaritu zaizkie gaurkoan. Oraindik askok Gazzanigaren titulartasuna dudan jartzen dute, eta larunbat honetan txanponaren bi aldeak ikusi ditu atezainak. Alde batetik, jokaldi batean huts galanta egin du baloia ateratzeko orduan. Ez du erabakirik onena hartu eta bizkarrez zegoen taldekideari emandako pasea Berenguerri iritsi zaio jaurtiketa oso gutxigatik kanpora joateko.

Hau gutxi balitz, beste jokaldi batean Gironako atezainak justu samar atera du baloia, Athleticeko aurrelariari aurreratuz, defentsan zeuden dudak areagotuz.

Baina, bestetik, heroia ere izan da Berenguerri penalti bat gelditzean. Zuri-gorrien aurrelariari berari egin diote falta area barruan eta, VAR-a ikuskatu ostean, epaileak penaltia adierazi du. Gazzanigak duda guztiak uxatu ditu baloia gelditzerakoan.

Bilbotarren minuturik onenak ziren, baina Gironak aurrera egin du eta gola iritsi da. Asprillaren erdiraketa erdiratua eta Miguel Gutierrezen engainua baloia pasatzen uzterakoan –agian pentsatuz jokoz kanpo zegoela– denak utzi ditu geldirik eta Padillari ez dio denbora eman baloia gelditzeko.

Gol honek, moralki, kolpe handia izan zitekeen. Baina Valverderen taldea ez da segituan amore ematen duen horietakoa eta bi minutu bakarrik behar izan ditu berdinketa lortzeko. Berenguer agertu da berriro, Oihan Sanceti pase ederra emateko eta nafarrak baloia ezkerrez gurutzatu eta gola egiteko. Jokaldi honen alderdi negatiboa Sanceten lesioa izan da. Ez dirudi ezer larria, baina zelaia utzi behar izan du Unai Gomezi pauso emateko atsedenaldia gertu zegoela.

Bost minutuko luzapena izan duen lehen zati honetan beste bi jokaldi gehiago ikusi ahala izan dira. Lehenengoan, De Marcos salbatzaile egon da. Danjumak autopasea egin du kanporatzetik gertu egon den Padilla atezainaren aurrean, baina Guardiako hegalekoa iritsi da lehenago. Eta azken jokaldian, Berenguerrek –beste behin– jokaldi bikaina egin du, kontraerasoan bere zelaitik, baina jaurtiketa gora joan zaio. Agian Iñaki Williams zuen ondoan pasea emateko...

Padilla salbatzaile, baina penalti batekin galdu

Bigarren zatian, Gironak beste pauso bat eman du aurrera, baina segituan aldatu dira gauzak, epaileak Iñaki Williamsi egindako penalti bat adierazi duenean, berriro ere VAR-a ikuskatu ostean.

Williamsek berak jaurti du penaltia, baina erdira eta oso gaizki botata. Baina epaileak beste aukera bat eman die bilbotarrei, atezaina aurreratu baita eta jaurtiketa errepikatzea adierazi duelako. Kasu honetan hirugarrengo jaurtitzaile batek probatu du, baina Ander Herreraren jaurtiketa okerragoa izan da, erdira baita ere, eta Gazzanigak hankekin gelditu du.

Honek morala eman die Gironako jokalariei eta hortik aurrerako aukera garbienak etxekoenak izan dira. 60. minutuan Asprillak aukera bikaina izan du, baina Vivian salbatzaile egon da marra gainean.

Zuri-gorriek sufritu behar izan dute azken minutuetan, baina Alex Padilla bikain ari da Unai Simon eta Julen Agirrezabalaren hutsuneak betetzen, eta Mexikoko 23 urtez azpikoarekin deitua izan den atezainak bi geldialdi ikusgarri egin behar izan du berdinketa mantentzea lortzeko. Valverdek badu lana ere atean nor jarri aukeratzeko.

Bigarren zatian, Gironak zenbait esku eskatu ditu Athleticen area barruan, baina epaileak ez du ezer adierazi. Bai adierazi duela, ordea, penaltia etxekoen alde 98an, area barruan egindako falta batengatik. Eta Stuanik ez du hutsik egin 2-1ekoa egiteko. Zuri-gorriek badute lana nazioarteko konpromisoengatik egongo den geldialdi honetan: penaltiak praktikatzea goiz eta arratsaldez.

PARTIDAKO FITXA:

2 - Girona: Gazzaniga; Arnau (Juanpe, 90+11), David Lopez, Krejci, Miguel; Herrera, Ivan Martin (Misehouy, 90+3); Asprilla (Frances, 90+11), Van de Beek, Danjuma (Bryan, 59); eta Abel Ruiz (Stuani, 90+3).

1 - Athletic: Padilla; De Marcos, Paredes, Vivian, Adama (Yuri, 78); Ruiz de Galarreta (Jauregizar, 59), Ander Herrera (Prados, 79); Iñaki Williams, Sancet (Unai Gomez, 43), Berenguer; eta Guruzeta (Djalo, 59).

Epailea: Pulido Santana. Txartel horia atera die etxeko Krejci (31’), Gazzaniga (56’), David Lopez (57’) eta Herrerari (91’); eta kanpoko Viviani (45+3). Gainera, Paredes kaleratu du bi horirekin (97 eta 98).

Golak: 1-0, 39. min.: Asprilla. 1-1, 41. min.: Sancet. 2-1, 99. min.: Stuani, penaltiz.