Urriaren 17an ospatzen den Pobrezia Desagerrarazteko Nazioarteko Egunaren karira, Munduko Bankuak ‘Pobrezia, Oparotasuna eta Planeta’ ikerketa aurkeztu du astearte honetan, covid pandemiaz geroztik pobrezia desagerrarazteko bidean egindako aurrerapen globalaren lehen ebaluazioa. Bertan ohartarazten duenez, ezinezkoa izango da 2030. urterako pobrezia desagerraraztea, Nazio Batuen Erakundearen (NBE) 2030 Agendak ezarritako helburua alegia.

Txostenak zehazten duenez, azken hamarkadetan hobekuntza «izugarria» izan da eta 1.000 milioi pertsona baino gehiago pobreziatik atera dira. Hala ere, azken urteotan joera hori moteldu egin da, batez ere pandemiaren ondoren.

«Hazkunde ekonomiko motela, pandemia, gehiegizko zorra, gatazkak eta inpaktu klimatikoak dira atzerakada horren erantzuleetako batzuk», adierazi du Axel van Trotsenburg Munduko Bankuko zuzendari gerenteak.

Izan ere, gaur egun, munduko biztanleriaren %44 egunean 6,85 dolar baino gutxiagorekin bizi da. Gainera, munduko biztanleriaren %8,5, ia 700 milioi pertsona, muturreko pobrezian bizi da, hau da, egunean 2,15 dolar baino gutxiagorekin. Eta azterlanak dio 2030erako %7,3k egoera berean jarraitzea espero dela.

Dokumentuak dioenez, erritmo horretan hiru hamarkada baino gehiago beharko lirateke pobreziarekin amaitzeko, batez ere diru-sarrera txikiko herrialdeetan.

Era berean, txostenaren arabera, munduko populazioaren ia bostetik bat klimaren gertaera latzen batengatik kolpatua izango da bere bizitzan zehar, eta hortik errekuperatzea kosta egingoo zaie. Horregatik, Munduko Bankuak pobrezia murrizteko beharra karbono isurien murrizketarekin lotzen du.

Emakumeak, okerrago

Muturreko pobreziak bereziki eragiten die emakumeei. NBEren beste txosten baten arabera, mundu osoko 2.000 milioi emakume eta neska inguruk ez dute inolako gizarte babesik, hala nola langabezia, pentsioak, osasun arreta edo amatasun prestaziorik.

2015etik gizarte babesak gora egin duen arren, horrek mesede handiagoa egin die gizonei, genero arrakala handituz eta emakumeak eta neskak ahulago bihurtuz.

Hala, nazioarteko erakundeak ohartarazi du emakumeen eta gizonen arteko arrakala gero eta handiagoa dela. Zehazki, txostenak zehazten du 25-34 urteko emakumeek muturreko pobrezia jasateko joera handiagoa dutela adin tarte bereko gizonek baino.

Gehien kezkatzen duen gaietako bat amatasunarekin lotuta dago. Txostenaren arabera, mundu osoko emakumeen %63k baino gehiagok erditzen jarraitzen dute amatasun prestaziorik jaso gabe. Saharaz hegoaldeko Afrikan, zifra hori %94ra igotzen da.

Txostenak, halaber, amatasunari buruzko finantza laguntzarik ezak emakumeak desabantaila ekonomikoan jartzeaz gain, seme-alaben osasuna eta ongizatea arriskuan jartzen dituela eta, aldi berean, belaunaldien arteko pobrezia betikotzen duela salatzen du.