Ene Kantak proiektuak ‘Bisonte-Mastodontearen bila’ ikuskizun berria eskainiko du Bilbon, Donostian eta Iruñean. «Data bakoitzeko bi emanaldi egingo ditugu abenduan, Gabonak familian ahalik eta modurik onenean ospatzeko», iragarri dute. Bilbon abenduaren 23an (16.00etan eta 18.30ean) izango da Euskaldunan, Donostian abenduaren 28an (16.00etan eta 18.30ean) eta 29an Victoria Eugenian (12.00etan eta 17ean) eta Iruñean abenduaren 30ean (16.00etan eta 18.30ean) Baluarte Auditorioan.

Donostiako eta Iruñeko sarrerak astearte honetan jarriko dituzte salgai, 11.30ean, eta Bilbokoak uztailaren 4an, 10.00etan.

Ene Kantak egitasmoak Historiaurrearekin lotutako bere azken ikuskizuna eskainiko du. Ene Kantak-ek eta Txantreako erraldoien konpartsak egindako antzezlanak 40 laguneko lantaldea bildu du, abeslariak, aktoreak eta dantzariak barne. «Historiaurreko paisaiak birsortzen dituen eta panpina handiak eta ikus-entzunezko elementuak erabiltzen dituen eszenografia ikusgarriarekin, haur eta handiak liluratzea eta gozaraztea bilatzen du obrak, bisonte baten bila Aralar mendilerroan abentura zirraragarri bat aurkeztuz», zehaztu dute.

Historiaurrea oso gai erakargarria da haurrentzat. «Hainbat ikastetxetan proiektu gisa lantzen dute, inguruko ezagutza, geografia eta naturarekiko errespetua bezalako eduki interesgarri eta aberasgarriak esploratzeko aukera emanez. Jarduera horien ekintza Aralar mendilerroan kokatzen da, eta bertan pertsonaiek bizitzeko baliabideak lortzen dituzte, hala nola fruituak eta ehiza, kobazulo bat aterpe gisa erabiliz. Testuinguru horrek historiaurreko bizitzari buruz eta gure ingurune naturala zaintzearen garrantziari buruz ikasteko aukera ematen du», gaineratu dute.

2010ean ekin zion bideari Ene Kantak proiektuak. «Hasiera batean planteamendu guztiz apala izan zen: haurrentzako abestiak euskaraz sortzea eta ikastetxeetako haurrekin bideoklipak grabatzea», gogoratu dute. Laster iritsi zen bere lehen diskoa 19 abestirekin Jesus Irujoren laguntzarekin eta 2012tik Euskal Herriko ma,ina bat txokotara eraman dituzte bere ikuskizunak. 150 abesti berri sortu dira Youtubeko kanalean, eta 95 milioi ikustaldi baino gehiago, 9 disko argitaratu, 3 liburu editatu eta 5 denboraldi eman ditu ETB3n, 1.250 kapitulu baino gehiagorekin.

«Ene Kantak-en helburua beti izan da euskarazko kantuak sortzea, gurasoen eta seme-alaben arteko transmisioa errazteko. Familia askok ekintzak behar dituzte euskararen erabilera indartzeko: hezkuntzarekin lotutako ingurune batetik kanpo erabilera da gakoetako bat. Haurtzaroan euskararen erabilera badago, hazi esanguratsu bat landatzen da, hizkuntza baloratzeko eta ondorengo faseetan erabiltzen jarraitzeko», nabarmendu dute.