Azpeitian amaituko du urtea Bulego taldeak Sanagustin kulturgunean eskainiko dituen bi emanaldi berezietan. 2020 urtean ezagutu genuen Bulego taldea, eta geroztik ez dira agertokietatik jaitsi. 2024 urtea beroa izan da taldearentzako, eta sona handitu bestetik ez da egin, emanaldi jendetsuak eskainiz urte osoan zehar.

Egindako lana borobiltzeko Azpeitiako Sanagustin kulturgunea aukeratu dute, etxetik gertu eta lagun eta zaleen babesean  abenduaren 27 eta 28an burutuko diren bi kontzertuetan. Bi emanaldi hauetarako sarrera guztiak amaitu dira jada, eta beraz, egun berean ez dira eskuragai izango aretoaren leihatilan.

Magazina

Durangoko Liburu eta Disko azokan ikusi zuen argia Bulego taldearen azken artefaktuak. Ohiko diskotik haratago joan da banda beste behin ere, eta Bulegoren bizierak biltzen dituen magazin ederra plazaratu dute, argitara eman gabeko dozena argazki eta bitxikeria biltzen dituena. Bide horretan QR bat ere izan du magazineak, non kantu berri bat entzuteko aukera ematen duen.

Gure Bihotzaren Taupadak

Izan ere taldeak argitaratu duen azken abestia ‘Gure bihotzaren taupadak’ izena darama, eta Euskaraldiaren laugarren edizioaren soinu banda izango da. Berriki ikusi du argia kantuak, eta dagoeneko plataforma digital guztietan entzun daiteke, bai eta youtube kanalean ikusi bideoklip eran. Euskaraldia 2025eko maiatzaren 15etik 25era burutuko da Euskal Herri osoan zehar, eta Bulego taldearen musika izango da protagonistetako bat.

Azken emanaldiak eta etenaldia

Taldeak iragarri duenez 'Aldatu aurretik' bira amaiera 2025 urteko azaroan burutuko da Bilboko Euskalduna jauregian eskainiko dituen bi gaualdi berezietan. Azaroaren 9ko sarrerak azkar amaitu ondoren, hitzordu berri bat finkatu du taldeak azaroaren 8rako. Oraindik geratzen dira sarrera batzuk bigarren emanaldi honetarako, eta Bulegoren atari digitalean eskura daitezke amaitu bitartean. Gerora etenaldi luze bat egingo du taldeak, eta 2026 urte osoan zehar ez dute kontzerturik eskainiko.