Aste honetan BECen ospatzen ari den Makina-Erremintaren Bienalean ia 300 metro koadroko stand bat jarri du Tecnaliak. Bertan, enpresa berriaren barruko funtsezko lan eremuen bilakaera erakusteko, punta-puntako 20 garapenen berri eman du.

Alde batetik, elektronika inprimatuko teknologien aprobetxamendua erakusten da standean. Soluzio horiek Tecnaliak patentatu ditu «industria garapenak smart produktuen eta balio erantsi handiko produktuen fabrikaziorantz eboluzionatzeko, negozio ereduak eraldatzeko aukera ematen baitute, soluzio eraginkorragoak, arinagoak, kontsumo txikiagokoak eta iraunkorragoak integratuz».

Elementu berezi eta nabarmen gisa, industria sektoreko lau hankako robot aurreratuena erakutsi du, zeinak mugikortasun ahalmenak eta ingurunearen ezagupen adimenduna baititu.

Standean «aginte digitaleko zentro» bat ere badago, enpresaren alderdi guztiak kontrolatzen dituzten aplikazioak zentralizatzen dituena. Hala, datuaren adimena pertsonen zerbitzura jartzen da, lanean laguntzeko, 360°-ko ikuspegiarekin. Ikuspegi horrek oztopoak ezabatzen ditu, eta uneoro eta edozein tokitatik kontrola daiteke, modu naturalean eta azalpenez, analitika aurreratuko ezagutza adituaren beharrik gabe.

Gune horri esker, Tecnaliak industria enpresekin garatu dituen monitorizazio, simulazio eta iragarpen aplikazioetara sartu ahal izango dira bisitariak, negozioaren funtsezko alderdi guztien kontrol adimendunean eta prozesuen digitalizazioan aurrera egin dezaten, kalitatea hobetzeko eta optimizatzeko eta materialen eta energiaren kontsumoetan eraginkortasuna lortzeko.

Bisitariek bertatik bertara erabili ahal izango dituzte Tecnaliak enpresei erraztasunak emateko beren zerbitzu eta instalazioak beren balio katearekin lotzeko garatutako aplikazio interaktiboak. Aplikazio horiek, lehenik eta behin, urruneko laguntza soluzioak eskaintzen dituzte, eta bezeroei zerbitzuak ematen dizkieten instalazio fisikoekiko bisitak eta murgiltze elkarreraginak eskaintzen dizkiete. Bigarrenik, beren negozio ereduen eta fabrikatzen duten produktuaren ustiapen ereduen eraldaketa askoz sakonagoa izango denaren adibide batzuk erakusten dituzte, ohiko salmenta ereduetatik beste eredu batera pasatuz, zeinean diru-sarrera errekurrenteak sortzen baitira bezeroak makinak erabiliz.