Diagnostikorik gabeko 91.450 diabetiko inguru daude Hego Euskal Herrian. Araba, Bizkaia eta Gipuzkoan, 214.349 biztanlek diabetesa dute, eta horietatik 71.450 zerbitzu medikuek diagnostikatu gabe daude, Diabetesaren Espainiako Federazioak (FEDE) emandako datuen arabera.

Nafarroan, berriz, Anadi Nafarroako Diabetes Elkarteak azaroan emandako datuen arabera, 20.000 pertsona inguru daude diagnostikorik gabe, eta 42.000 diagnostikatuta (gehienek 2. motako diabetesa dute, adinari eta bizitza ohiturei loturikoa).

FEDEk, ‘Ez eman bizkarra diabetesari’ kanpainaren bidez, gaixotasun hori ikusaraztea eta pazienteek diagnostiko goiztiarra izatearen garrantzia azpimarratu du, osasun konplikazioak saihesteko eta patologia horren ondoriozko osasun kostuak murrizteko.

Diabetesaren ondoriozko zenbatekoek 5.809 milioi euroko osasun gastua eragiten dute urtean; horietatik 2.143 milioi patologiaren ondoriozko konplikazioen ondorio dira, eta murriztu egin daitezke diabetesa duten pazienteek heziketa diabetologiko egokia badute.

Iratxe Vilariño Pampin EAEko Diabetikoen Elkarteen Federazioko (FADE) presidenteak adierazi duenez, «garrantzitsua da diabetesa dutenak patologia hori dutela jabetu daitezen, eta hasieratik behar bezala prestatu ahal izatea diabetesa ondo kontrolatzeko. Hezkuntza diabetologiko hori, gainera, diabetesean aditua den osasun profesional batek egin behar du. Horrela, pazienteak diabetesaren tratamenduarekiko atxikimendu handiagoa izan ahal izango du eta, aldi berean, osasun kostuak murriztu egingo dira».

Estatu espainiarrean, diagnostikorik ez duten diabetikoak 1,5 milioi pertsona baino gehiago dira. Andaluzian dago diabetesa duten pazienteen kopuru handiena (823.704), eta horietatik 274.568 diagnostikatu gabe daude.