Zuricheko Eskola Politekniko Federaleko (Suitza) zientzialariek Hong Kongen 9.300 kilometrora zegoen txerri bati ebakuntza egin diote, zunda gastriko bat erabiliz. Aurrerapen hori gizakiengan ere aplikatu ahal izatea espero dute, munduko eskualde isolatuetan edo teknologia han garatuta ez dagoen lekuetan kirurgietarako sarbidea handituz.

‘Advanced Intelligent Systems’ aldizkari zientifikoan argitaratu dira iragan maiatzean egin zen ebakuntzaren emaitzak. Lan hori Hong Kongeko Txinako Unibertsitatearen laguntzarekin egin zuten, eta Alexandre Mesot EPFZko Robotikako doktoregoko ikasleak gidatu zuen zunda, bideojokoen kontsolako aginte bat erabiliz.

Pantaila baten bidez, eta 300 milisegundoko atzerapenarekin, zundaren aurrerapena kontrolatu ahal izan zuen animaliaren urdailetik, eta egiaztatu zuen zuzen erantzuten ziola bere aginduei.  Animalia bizidun batekin ez da orain arte halako saiakerarik egin.

Ebakuntza zunda gastriko bati eta endoskopio bati esker egin ahal izan zen. Zunda eta endoskopio horiek urrutiko operazio mota horretarako garatu ziren bereziki, eta imanak zituzten mugimendua kontrolatzeko.

Shanghainko sailkapenaren arabera Europako ospetsuenetakoa da Zuricheko eskola eta bertan garatu zuten endoskopioa, ohikoak baino txikiagoa da eta giza gorputzean sartzen da sudurretik baizik, ahotik beharrean.

Teknika horrek, ikerketaren arduradunen arabera, ebakuntza-mota horien mugak murriztu ditzake, eta, gainera, ez luke anestesia orokorrik behar.

«Teknologia horrek potentzial handia du», adierazi du beste arduradunetako batek, Bradley Nelsonek.