Lakuako Osasun Sailak GPBaren aurkako txertoa jartzeko egindako gomendioak eguneratu ditu eta txertaketa jarraibide berri bat ezarriko du 2024/2025 ikasturtean, dosi bakarrarekin 2013an jaiotako ikasleentzat. Bestetik, txertoa jaso ez duten 25 urtera arteko gizonezkoak erakartzeko ezohiko kanpaina bat jarriko da abian.

Erkidegoak 2007/2008 ikasturtean txerto egutegian sartu zituen 1995ean jaiotako 13 urteko neskatoak. Txertaketa eskola ingurunean egin zen, txerto tetrabalente batekin eta hiru dosiko jarraibide batekin.

Ordutik, programa horrek hainbat aldaketa izan ditu, eta arrisku baldintza jakin batzuk dituzten pertsonen txertaketa ere sartu da.

Besteak beste, 2014/2015 ikasturtean 12 urtera jaitsi zen txertaketa adina, txertaketa estaldurak hobetzeko; 2018/2019 ikasturtean, txerto tetrabalentearen ordez txerto nonabalentea jarri zen, eta 2020/2021 ikasturtean, bi dosira murriztu zen jarraibidea, dosien arteko sei hilabeteko tartearekin.

Azkenik, joan den ikasturtean, giza papilomaren birusaren aurkako txertaketa programa zabaldu egin zen, haurrak ere barne hartzeko.

Osasun sailak azaldu duenez, EAEko Txertoen Aholku Batzordeak txerto horren jarraibidea aldatzea gomendatu du, 12 urteko haurren txertaketa egutegian bi dositik dosi batera, OMEren gomendioetan, Osasun Ministerioaren Txertaketen Programaren eta Erregistroaren Txostenaren gomendioen berrikuspenean eta aldaketa hori bermatzen duen «ebidentzia zientifikoan» oinarrituta.

GPBaren aurkako txertaketa gomendio berriak ezartzeko estrategiaren arabera, txerto dosi baten jarraibide berria ezarriko da eskola eremuan 2024/2025 ikasturtean, 2013an jaiotako eta Lehen Hezkuntzako 6. maila egiten ari diren ikasleentzat.

Aldi berean, 25 urte bete gabekoak erakartzeko ezohiko kanpaina bat egingo da, eskola eremuan eta osasun zentroetan hainbat fasetan egingo dena.

Txertaketa sustatzeko neurrien artean, 2025/2026 ikasturtean aurretik txertatu gabeko 18 urtera bitarteko mutilak eta 2026ko abuztutik aurrera 25 urtera arteko mutilak SMS bidez kontaktatzea aurreikusten da.

Arrisku taldeak

Arrisku taldeetako pertsonei edo osasun baldintza jakin batzuk dituztenei dagokienez, 2022ko urrian, GPBren aurkako txertaketa programaren helburu orokorra bi sexuetan infekzio iraunkorra eta GPBarekin lotutako gaixotasunak prebenitzera zabaldu zen, genotipo eragilea edozein dela ere, zerbixean, eremu anogenitalean eta buru eta lepoan.

Txertaketa gomendioak aurtengo otsailean berrikusi ziren berriro, eta txertoa 45 urtera arte txertatu ez diren pertsonei ematen zaie, arrisku egoera jakin batzuk edo immunosupresioa dituztenen kasuan.