Atmosferan nanoplastiko asko daudela ohartarazi du ikerketa batek

Nanoplastikoak planetaren kutsadura atmosferikoaren arazo nagusietako bat bihurtu dira; izan ere, ikerketa baten arabera, Suitza bezalako herrialde batek 43 bilioi partikula toxiko jasotzen ditu urtean.

Dominik Brunner Suitzako Materialen Zientzia eta Teknologiako Laborategi Federaleko (EMPA) adituak egindako ikerketak atmosferan nanoplastiko asko daudela ohartarazi du. Partikula horiek nanometro bat eta ehun nanometro artekoak dira, eta milaka kilometro egin ditzakete airean zehar.

Suitzaren kasuan, zientzialariek adierazi dute urtero 3.000 tona nanoplastiko inguru pilatzen direla eta Alpeetako gune urrunenetatik altuera txikieneko hirietara bidaiatzen dutela.

Austriako eta Herbehereetako erakundeek ere parte hartu zuten ikerketan, eta adierazi zuten ozeanoetako plastikoak ere atmosferara iristen direla, olatuen ihintzak garraiatzen dituen nanoplastikoen bidez.

Azterketan aztertutako partikula alpetarren %10 inguruk 2.000 kilometro baino gehiago egin zituzten, horietako batzuk Atlantikotik, goi mendiko eremuetan utzi aurretik.

Urtero 4.980 milioi tona inguru botatzen diren hondakin plastikoak dira partikula ñimiño horiek askatzeko arrazoi nagusia, baina ez bakarra. Ikertzaileen hipotesiaren arabera, ontziak eta arropa bezalako produktuak egunero erabiltzeak nanoplastikoak ere askatzen ditu, eta partikulak hain arinak direnez, airean duten mugimendua gasena bezalakoa da.

Adituak, orain, airearen kutsadura mota hori gizakien osasunerako mehatxu potentziala ote den aztertzen ari dira. Oraingoz, arnasketaren bidez odol fluxura sartzea lor dezaketela zehaztu dute, organismoan izan ditzakeen ondorioak zehatz-mehatz ezagutu gabe.