Kontsumobide-Kontsumoko Euskal Institutuak gomendatzen du arreta berezia jartzea uztailaren 23ko hauteskunde orokorretarako deialdiaren aurrean kontratatzen diren bitartean bidaiak, hegaldiak eta opor-paketeak bertan behera uzteko baldintzei; izan ere, gerta daiteke kontsumitzaileek oporrak bertan behera uzteko edo aldatzeko betebeharra izatea, hauteskunde-mahai batean parte hartu behar badute.

«Nahi ez diren» egoerak prebenitzeko, gomendagarriena da «arreta berezia jartzea ezerezte- edo aldaketa-baldintzei, zalantzak argitzea eta edozein kontratu sinatu aurretik idatziz ezerezteko balizko baldintzak eskatzea». Pertsonak bidaia ezeztatzeko edo aldatzeko aseguru bat kontratatzea erabakitzen badu, aldez aurretik ziurtatu beharko du hauteskunde-mahai bateko kide izendatzeko aukera poliza horrek estaltzen duela.

Hilabetetik beherako epea

Bidaia bertan behera utzi edo aldatu behar izanez gero, eta kontratua egin zaion enpresarekin akordiorik lortzen ez bada, lehenengo urratsa kontratua egin zaion enpresari berari erreklamazio bat aurkeztea izango da.

Enpresa horrek hilabetetik beherako epean erantzun beharko du. Erantzun egokirik lortzen ez bada, hainbat erakundetara jo behar da kontratatutako zerbitzuaren arabera: hegaldi baten kasuan, AESAra (Aire Segurtasuneko Estatu Agentzia); opor-paketeen edo bidaia konbinatuen kasuan, dagokion erkidegoko turismo-zuzendaritzara; eta hotel-egonaldien kasuan, Kontsumobidera edo kontsumitzaileei informazioa emateko udal-bulego batera (KIUB).