Batzordeak Koral Hesi Handiari buruzko txosten baten zirriborroa azpimarratu zuen. Txosten horretan «kezka handiz» ikusten da krisi klimatikoak eta koralen zuritze masiboak munduko ondare horren osasunean eragiten duten «etengabeko mehatxua».

Era berean, «kezka handiz» ikusi ditu baso-soiltze indize handiak uraren kalitatean duen eraginagatik, eta Australiako Gobernuari «premiazko neurriak» har ditzala eskatu dio, Barrera Handia, munduko koral-sistema handiena, babesteko.

Hesi Handian mailasareko arrantza kentzeko Australiak emandako pauso batzuk onartu ditu, baita emisio kutsatzaileak murrizteko helburu berriak finkatu izana ere, baina, hala ere, batzordeak gomendatu du 2026ra atzeratzea Hesi Handia arriskuan dagoen ondarearen zerrendan sartzeko aukera.

«Etengabeko ahaleginak», onartuta

Dokumentua argitaratu ondoren, Australiako Gobernuak eta Queensland estatukoak komunikatu batean adierazi zuten Unescok onartu egin dituela herrialde ozeanikoak munduko ikono hori babesteko egiten dituen «etengabeko ahaleginak».

Horien artean daude Queenslanden 2035erako emisio kutsatzaileak %75 murrizteko eta 2050erako emisio neutroak lortzeko legea, eta 2015etik 665 milioi dolar baino gehiago inbertitzea Koral Hesi Handia babesteko ekimenetan, komunikatuaren arabera.

Hesi Handia 2.300 kilometrotan zehar hedatzen da Australiako ekialdeko kostaldean, eta 400 koral mota, 1.500 arrain espezie eta 4.000 molusku barietate bizi dira bertan. 1990eko hamarkadan hasi zen hondatzen, itsasoko uraren berotzeak eraginda.