10 ENE. 2024 Arabako Foru Museoen Sareak 122.00tik gora bisitari izan ditu 2023an 2022an baino 15.186 turista gehiago izan zituen iaz Arabako Foru Museoen Sareak: BIBAT, Arte Eder, Arma, Natura Zientziak, Iruña Veleia eta La Hoya museo eta aztarnategiek. «Zifra horiek berriz ere arrakastatsuak, oso positiboak eta ospatzeko modukoak dira», diote Arabako Kultura sailetik. Museoan ikusgai dagoen torno bat. (Eli TXAPARTEGI) Bidaiari Arabako Foru Museoen Sareko BIBAT, Arte Eder, Arma, Natura Zientziak, Iruña Veleia eta La Hoya museo eta aztarnategiek 122.245 bisitari izan dituzte 2023an, aurreko urtean baino 15.186 gehiago (+%12,42). Foru sarearen historiako hirugarren kopururik altuena da, eta 2019ko marka historikotik 2.946 bisitarira geratu da, orduan 125.191 bisita erregistratu baitziren, Ana del Val Arabako Aldundiko Kultura eta Kirol Saileko foru diputatuak jakinarazi dutenez. Urteko zazpi hilabetetan 10.000na bisita baino gehiago izan dira museo eta aztarnegiotan, eta abuztua izan da hilik onena, 14.407 bisitarirekin. Halaber, martxo, apiril eta uztaileko bisitak ere nabarmendu dira (11.488, 12.511 eta 10.166, hurrenez hurren). «Oso positiboa» Gainera, urteko azken hiruhilekoan izandako bisitarien kopurua ere «oso positiboa» izan da, 10.099, 10.297 eta 11.187 bisitarekin, hurrenez hurren. Hilabete guztiek gainditu dute aurreko urtekoa, urrikoak eta azarokoak izan ezik, bitxia bada ere. Museo eta aztarnategien arabera, guztiek gainditu dituzte 2022ko zifrak, salbu eta aztarnategiek eta Natura Zientzien Museoak, 256 bisita eskasegatik ez bada ere; izan ere, iaz bisiten marka historikoa izan zuen, 2019ko datuen gainetik, eta 2023koa izan da bere bigarren erregistro historikoa. «Zifra horiek berriz ere arrakastatsuak, oso positiboak eta ospatzeko modukoak dira. Goranzko joera argia dago, eta horrek erakusten du foru museoak behin betiko finkatu direla lehen mailako kultura baliabide gisa, bai Araban bizi direnentzat, bai bisitatzen gaituzten turistentzat», ziurtatu du Ana del Valek.