Orain arte nahiago izan du Gobernu frantsesak kalapita handiegirik ez sortu “txaleko horiek” ibilgailuen abiadura zaintzeko radarren aurka egindako ekintzen gainean, seguruenik ideiari jende gehiagok jarraipenik eman ez diezaion, baina azkenean zeozer esan behar izan du. Ostegunean egin zuen, Christophe Castaner Barne ministroaren ahotik: «Radarren ia %60 hondaturik daude, ‘txaleko horiek’ erasota». Alegia, Estatu osoko errepideetan 3.200 radar daudela kontuan hartuta, kasik 2.000 izango lirateke zerbitzurik gabe utzi dituztenak. Argazkian, Bretainiako Ville-et-Vilaine eskualdean hondatutako batzuk.AFP PHOTO