Donostiako inauterietako kartel irabazlea, plagioagatik erretiratua

Donostiako inauterietako kartel lehiaketako epaimahaiak ezohiko bilera egin zuen atzo eta, Paul Fuentes diseinatzaile grafiko mexikarrak aurkeztu zuen plagio salaketaren ondorioz, afixa erretiratzea eta irabazle aukeratu zuten irudiaren egileari, Maaher Abed-i, 1.000 euroko saria emateko agindua bertan behera uztea erabaki zuten. Haren izenik ez da palmares historikoan agertuko, aurkeztutakoa Fuentesen “Fashion Llama” lanaren plagioa dela egiaztatu baitute. Jatorrizko lanaren egileari «ordaina» ematea ere ebatzi zuten, «bere irudia iruzurrez erabiltzeak sor lekizkiokeen kalteengatik».

Argazkia: Abed-ek, Fuentesen irudia plagiatuta, aurkeztu zuen kartela. Ondoan, tamaina txikian, jatorrizko lana.