Errealaren ikurrean borboitarren koroarik ez!

Egun laurogei urte ditut, eta oroitzapena dudanetik realzalea naiz. Nire aitarekin Atotxara joaten nintzen igandero; gogoko nuen oso hango giroa. Heldu izatean gutxiago joan naiz partidak zuzenean ikustera, baina ze zirrara Kortabarria eta Iribarrek ikurrina atera zutenean, edo Ormaetxearekin irabazitako bi ligak, eta beranduago Toshack-ekin errege kopa... Nik Erreala Donostia eta Gipuzkoarekin hertsiki loturik sentitu dut, gure herriari, alegia. Bagenekien Errealari «Real» titulua Espainiako erregeak, Alfonso XIII.ak, hain zuzen, emana ziola... tira, inor ez da perfektua.

Baina bada hiru aste kezka handi bat dudala nire barnean, lagun batek Errealaren ikurrean dagoen koroa Borboi erregeen koroa zela erran zidan; ikurrari buruz idatzirik zegoena irakurri nuen eta lagunak arrazoia zuen, eta ez hori bakarrik, Errepublika garaian koroa kendua izan zen ikurretik eta frankismoan berrezarria. Nola liteke hau? Nolatan ez dugu orain arte deus egin? (agian egin da saiakeraren bat). Ez naiz hasiko zerrendatzen borboitarren koroa Errealaren ikurretik kentzeko arrazoiak, hamaika ditut, baina bada bat ukaezina: Gipuzkoarrok ez dugu koroa hori gure sentitzen; beraz, ahal bezain laster ikurretik ezabatua izan dadila eskatzen dut. Errealeko bazkide, jarraitzaile eta peñei deialdi honekin bat egitera deitzen diet, eta zuzendaritzari hartu beharreko erabakiak har ditzan, egoera lotsagarri honi aterabidea emanez.

Mila esker, mezu hau errealzale guztien artean zabaltzen laguntzeagatik. Gora Erreala! Gora Euskal Herria!