14 ENE. 2022 Erronka zaila Baskoniarentzat bere itzuleran Hamabost eguneko geldialdi behartuaren ostean, gasteiztarrek Real Madrilen etxean jokatuko dute gaur, orain arte inork irabazi ez duen kantxan. Asier AIESTARAN Bitci Baskonia gaur itzuliko da lehiaketara (20.45) hamabost eguneko geldialdi behartuaren ostean. Gasteiztarrek Real Madril indartsuari egingo diote bisita Euroligako 21. jardunaldiari dagokion neurketan, covid-19aren eraginez azken asteetan hainbat norgehiagoka atzeratu behar izan eta gero. Printzipioz, Vanja Marinkovic serbiarra eta Sander Raieste estoniarra izango dira hutsune bakarrak, jada taldearekin lanean ari baitira Rokas Giedraitis eta Lamar Peters, nahiz eta ikusi egin beharko den zer egoeratan dauden horrelako erronka bati aurre egiteko. Neven Spahija entrenatzailea ere taldea zuzentzeko moduan da, azken neurketak galdu ostean. Erronka zaila dela diogu, Pablo Laso gasteiztarrak zuzentzen duen taldeak oraindik ez duelako partida bakar bat ere galdu etxean. Euroligako sailkapenean bigarren postuan dago 14 garaipen eta 3 porrotekin eta argi dago lehiaketa irabazteko faboritoetako bat dela. Baskonia, bere aldetik, dezente beherago dago, 15. postuan 7-11ko balantzearekin, nahiz eta zortzigarren postua bi garaipenera dagoen oraindik. Jokatutako azken neurketak, gainera, oroitzapen benetan gozoa dakarkio Baskoniari, Bartzelona lider ahalguztidunari 94-75 irabazi ziolako Euroligan. Garaipen hura errepikatu ahal izateko, oso garrantzitsua izango da Real Madrilen barneko jokoari eustea, horixe baitute zuriek beraien indargune nagusietakoa –defentsan errebote gehien hartzen dituen taldea da Euroligan eta txapel gehien ipintzen dituena ere bai–. Walter Tavares, Vicent Poirier baskonista ohia eta itzuli berria den Anthony Randolph edonor beldurtzeko jokalariak dira; are gehiago, Baskoniak Landry Nnoko gabe jokatuko duela kontuan hartuta. Zorionez, Alec Peters osatu da eta pentsatzekoa da bere lehen minutuak izango dituela Wizink Center pabiloian. Erreferentziei begira jarrita, Europako lehiaketetan balantzea Baskoniaren aldekoa da: sei garaipen zurientzat eta zazpi euskaldunentzat. Baina lehen itzuliko partidan madrildarrek 60-88 argi batez irabazi zuten Buesa Arenan. «Ez naiz aurreko partidei begiratu zalea, denak desberdinak izaten direlako. Uste dut Baskoniak kalitate handiko jokalariak dituela, jaurtitzaile oso onak. Enochek hiruko jaurtiketa ona du, Peters sartuko da min hartuta egon ostean, Baldwinen jokaldiak, Granger... Erasoko leherketa horrek eragiten du batzuetan sekulako garaipenak lortzea, Bartzelonaren aurkako azkena adibidez», nabarmendu zuen atzo Pablo Lasok Baskoniari buruz bere prentsaurrekoan. Spahijak, aldiz, aurreratu zuen taldea ongi entrenatzen jardun dela azken egunetan. «Entrenamendu intentsoak egin ditugu eta jokalariak ongi daude, nahiz eta partidak jokatzea beste gauza bat den. Bost neurketa jokatu beharko ditugu bederatzi egunean eta prest egon behar dugu erronka gogor horri behar bezala aurre egiteko», adierazi zuen kroaziarrak. NNOKO Spahijak onartu zuen Nnoko ordezkatzeko pibot baten bila ari dela taldea, baina ez dutela «aldatzeagatik aldatu» nahi. Esan zuen Costellok hartu beharko duela postu horren zama eta Alec Peters jada jokatzeko prest dagoela.