22 AGO. 2022 ARRAUNA Oriok nagusi amaitu du Euskotren Liga; Donostiarrak, mailari eutsiz Bezperan erakutsitakoaren antzeko nagusitasunez gailendu dira «mirotzak» Euskotren Ligako azken estropadan. Donostiarra, berriz, Tolosaldea ez ezik, Arraun Lagunak gainditzeko gai ere izan da. Orioko eskifaia, pozarren Euskotren Liga aurkariak hankapean hartuta lortu ostean. (Jon URBE FOKU) Arnaitz GORRITI Jakina zen 2022ko Euskotren Liga Oriora joango zela, iaz Arraun Lagunaken aurka galdu zuen buruz burukoari goitik behera buelta eman ostean. Asteburuan Zarauzko XIV. Ikurrina ez zen salbuespena izan eta nahieran aritu ziren «mirotzak», sekulako erakustaldia emanda irabazi baitzuten. Bestalde, irribarre ia zabalagoa atera zuten atzo eguerdian Donostiarrako arraunlariek, beraiek bermatu baitzuten datorren urtean ere Euskotren Ligan aritu ahal izatea. Baina ez Tolosaldearen aurretik sailkatuta bakarrik, baita Arraun Lagunaken aurretik sailkatuta ere. Hala, Tolosaldearekiko hiru puntuko aldearekin eutsi zion sailkapen nagusiko hirugarren lekuari. Tolosaldeak, bestalde, play-offetan ekin beharko du, datorren urtean zortzi traineruk osatuko duten Euskotren Ligan aritu nahi badu. ETE Ligako hirugarrena eta Galiziako Ligako hirugarrena izango ditu aurrez aurre. «Gure helburua Tolosaldeari irabaztea zen eta lortu dugu. Denboraldia hasterakoan Arraun Lagunak eta Orioren inguruan ibiltzea zen; gaur lortu dugu eta, noski, oso pozik gaude», onartu zuen Nerea Perez Donostiarrako patroiak, eztarria urratuta, estropadako lanaren ondoren. GAUZAK GARBI Zozketaren apetak, Donostiarra eta Tolosaldea elkarren ondotik abiatu ziren, Euskotren Ligan «bizirauteko» behin betiko lehian. Zapatuan ez bezala, Donostiarrak askoz hobeto ekin zion lanari; harrokeriarik gabe, ordea. Esan gabe doa aurreneko postuari begira, Oriok, bezperan erakutsitako antzeko nagusitasunez sartu zuela branka, ontzi beteko aldea aterata bi minutu eta erdi betetzerako. Zarauzko XIV. Ikurrina goitik behera erabakita, hirugarren postua bermatzeko lehiak hartu zuen goitik beherako arreta. Tarteka hiru segundoko aldea atera eta Arraun Lagunaken parera iristea erdietsi zuen, nahiz eta ziabogan alde apur bat galdu zuen «Lugañene»-rekiko. Berdin izan zion. Azken txanpako lehia Arraun Lagunakekin finkatu zuen Donostiarrak, bigarren postuan branka sartu arte, Nerea Perez patroiaren animo deiadarrei jaramon eginez. Oriok bere nagusitasuna sendotu baino ez zuen egin 2022ko Euskotren Ligako azken estropadan, eta gozatu baino ez zuen egin itzulerako luzean. Bestalde, Donostiarrak berak ere bigarren postua finkatzea lortu du, eta hala, nahiz eta Tolosaldeak alde apur bat berreskuratu hirugarren postuarekiko, hirugarren postu horretan kontzentrazioa galduta aritu zen Arraun Lagunak geratu zen. URDAIBAI ETA HONDARRIBIA, BIAK POZIK «Ez nuke Zarauzko Ikurrina ezergatik aldatuko, nahiz eta pena bat izan den hamabi puntuak lortu ez izana», zioen Gorka Aranberri Urdaibaiko patroiak, XLV. Zarauzko Ikurrina Bermeora bidean jarri ostean. Hala ere, jardunaldiko hamabi puntuak Hondarribira joan ziren, bi ehunenekorengatik izan bazen ere. Bezperan egin bezala, azken txanpa bikaina egin zuen “Bou Bizkaia”-k, azken ziaboga emateko orduan ikurrina bera ere galduta baitzuen. Hala, olatu txiki baina biziak harrapatuta, Urdaibaik branka sartu ahal izan zuen azken 200 metroetan. “Ama Guadalupekoa”-k erreakzionatu zuen eta azken esprintean nagusi izan zen. BESTE KATEGORIAKKAE1 Ligan, Arkote nagusitu zen Bilboko Uria XLIX. Banderan, denboraldiko azken estropadan. Alabaina, San Pedrorekin batera, Pedreña izango da Eusko Label Ligara igotzeko play-offean. ETE Ligan, berriz, Deustuk irabazi zuen Bilbon eta ia eskuan dauka Euskotren Ligarako kanporaketan sartzea, estropada baten faltan.