02 OCT. 2022 PILOTA Uda sasoiko azken garaikurra erabakiko da Nafarroa Arenan Ezkurdia eta Mariezkurrena, udako denboraldian emaitzarik onenak lortu dituzten bi pilotariak, faborito irtengo dira Altuna eta Imazen aurka. Jon Mariezkurrena izan da udako pilotaria. (Oskar MATXIN EDESA | FOKU) Asier AIESTARAN Ezkurdia-Mariezkurrena II.a eta Altuna III.a-Imaz bikoteak uda denboraldiko azken garaikurra bereganatzen saiatuko dira gaur arratsaldean Nafarroa Arenako pilotalekuan jokatuko den Caixabank Masterseko finalean (18.00, ETB1). Ostiral gaueko finalerdietan bezalaxe, sarrera polita espero da gaur ere, udako torneoei agur beroa emateko. Faborito moduan Joseba Ezkurdia eta Jon Mariezkurrena irtengo dira. Ostiral gaueko finalerdian aise menderatu zituzten Jaka eta Zabaleta (22-7), aurtengo udan erakutsi duten nagusitasuna berretsiz. Berriozarreko atzelaria izan da seguruenik udako pilotari onena, eta ostiral gauean ere ez zion inolako aukerarik eman azken urteetan jaun eta jabe izaten ari zen Jose Javier Zabaletari. Zenbakiek ere horixe erakusten dute. Jon Mariezkurrenak bost final jokatu ditu aurtengo udako torneoetan -Iruñea, Bilbo, Donostia, Logroño eta Bizkaia Torneokoa- eta lau irabazi ditu, eta bakarra galdu -Logroño-. Gaurkoa seigarren finala du, irabaziz gero bosgarren garaipena, eta galduta ere inork ezin izango dio torneo gehien irabazi izanaren ohorea kendu. Aurrelarien artean Ezkurdia izan da emaitza onenak lortu dituena: hiru final -Gasteiz, Donostia eta Lau eta Erdiko San Fermin Torneoa- eta hirurak irabazi. Ostiral gaueko finalerdian ederki baliatu zituen Mariezkurrenak irekitako zuloak errematean luzitzeko. Lasok eta Altunak udan izan dituzten arazo fisikoek aukera eman diote beste behin bi izar handiengandik oso hurbil dagoela erakusteko. Hain zuzen ere, izar horietako bat izango du gaur aurkari: Jokin Altuna. Amezketako aurrelariak oso bikote sendoa osatzen du Ander Imazekin, finalerdietan argi ikusi zenez. Irribarria eta Albisu indartsu hasi ziren, markagailuan 6-11 aurreratuz, baina ez ziren erritmoari eusteko gai izan eta azkenean 22-15 gailendu ziren Altuna eta Imaz. Eta pronostikoak kontra eduki arren, argi Altunarekin: aurreko asteburuan Martijarekin San Mateo Torneoa irabaztetik dator, badirudi arazo fisikoak ahaztu dituela jada, eta Lau eta Erdiko Txapelketa hastear den honetan ziur amezketarra bere maila onenera hurbiltzen ari dela. AGIRRE, AURRERA Asier Agirrek Lau eta Erdiko Txapelketa jokatzeko aukera izango du, Baikok atzo Tolosan antolatutako atarikoan Joanes Bakaikoari 22-13 irabazi ostean. Iruindarrak alde handia izan zuen markagailuan hasieratik eta, bigarren zatian sufritzea tokatu zaion arren, batez ere arlo fisikoan, merezita lortu zuen aurrera egiteko txartela. Sakez zuzenean bi tanto bakarrik egin zituen arrotxapearrak, baina sake-errematearekin min handia egin zuen partidaren lehen erdi luzean, eta horri esker 15-4 aurreratu zen markagailuan. Bakaikoa, fisikoki osoago, saiatu zen bigarren erdian aldeak murrizten, baina sei tantora hurbildu zen gehienez (19-13). MARIEZKURRENAOstiral gauean jokatutako finalerdietan Mariezkurrenak beste erakustaldi bat eman zuen, orain gutxi arte jaun eta jabe zen Zabaleta txiki utziz.ALTUNAArazo fisikoen erruz uda zaila izan ostean, Jokin Altuna sasoiko iritsi da udazkenera. San Mateon garaile izan berri da eta ostiralean erabakigarria izan zen.