Erakusketa bakanak egiten ditu Juan Luis Goenagak (Donostia, 1953). Urteak dira Ekain arte galerian bere lanak erakusten ez zituela. 2013an izan zen azkena, hiriko beste bi aretoetan egin zituen ondoren. 35 obraz osatutako erakusketa dauka urtarrilaren 29ra bitartean, Donostiako Alde Zaharrean.

Aipagarria da “Eskulan” izeneko papera oinarri hartuta ondutakoak. Goenagak berak egiten du papera, eskuz, eta hori erabiltzen du euskarri moduan. «Konposaketa desberdinak erabiliz gogortu egiten du papera. Olioa edo teknika nahasiak erabiltzen ditu. Ia gehienetan lurrean bertan lantzen ditu eta zapaten hatzak ere ikus daitezke», azaldu du Rita Unzurrunzaga galeristak.

Kolore bizien aldeko apustua egin du Goenagak: magentak, urdinak... ikus daitezke han-hemen. Baita horia ere, kasu batzuetan. «Hurbilduz gero abstraktuak direla ikusten duzu, baina distantzia hartzen zoazen heinean paisaiak eta figurak antzematen dituzu», zehaztu du.

Formatu txikia eta ertaina erabili ditu. Barne sentimenduak adierazteko tresna da paisaia Goenagarentzat.

Gabonetan beste hainbat sortzaileren lanak ere bildu ditu Ekain galeriak. Hamar diseinatzaileren lanak daude. Virginia Ameztoiren eta Gabriel Muñagorriren oihalak; Titty Thusbergek artilez paper gainean egindako lanak, postal itxura hartzen dutenak; Zuriñe Uriarteren ilustrazioak; Joseba Lekuonak marmolezko harri piezatik ateratako platerak; Ana Sistiagaren rafiazko brotxeak eta poltsak; Elena Cajaravilleren eta Marta Fernandez Caballeroren kasuan bitxiak, eta Aran Santamariaren pop-up artelanak.

Gaur jarriko dira salgai urtarrilaren 7ra arte.