BCCk ziurtatu du Groseko proiektuak «berdeguneak errespetatzen» dituela

Basque Culinary Centerrek GOe proiektua aurketzu zuen hedabideen aurrean atzo goizean. Azken hilabeteetan agertu diren kezkei eta kritikei erantzun zieten, berdeguneak errespetatuko direla ziurtatuz. Irabazi asmorik gabeko proiektua dela azaldu zuten, eta hiritarrekin «gardentasunez jokatu» nahi dutela nabarmendu zuten.

Gastronomy Open Ecosystem (GOe) izena du Basque Culinary Centerren «proiektu estrategiko eta jasangarri» berriak. Gastronomiaren eta lurraldearen etorkizuneko proiektua dela azaldu zuten atzo egindako aurkezpenean. Auzotarren artean gatazka sortu duen proiektua izan da, batez ere auzoaren inguruneko parkeak hondatzen baititu.

«Gastronomiaren eta elikaduraren etorkizuneko erronka handiei» erantzuteko proiektua dela adierazi zuten, GOe deiturikoa. Joxe Mari Aizega BCCko zuzendariak aurrez izandako kezkak argitzeko baliatu zuen aurkezpena. Inguru horretako berdeguneak suntsitzea izan da auzotarrek behin baino gehiagotan azpimarratutako kezketako bat. Aizegak azaldu zuen, 2010ean onetsitako Hiri Antolamenduko Plan Orokorrean ezarritakoaren arabera garatu eta urbanizatu beharreko hirigintza eremuaren barruan dagoela GOe eraikiko den eremua. Hau da, garatu beharreko 24.250 m2-ko lur zatiaren 3.800 m2 hartzen dituela BCCri utzitako lur zatiak, aldatu beharreko %15,6 hain zuzen ere. «Eraikinak egungo gizarte eta aisi erabilera guztiei eutsiko die, eta bermatuko du gaur egungoaren ia baliokidea izango dela aztarna berdea», zehaztu du zuzendariak.

Eremu berdearen kezkaren inguruan, bertako zuhaitzak suntsitzearena izan da azken hilabeteetako kexetako bat. Aizegak adierazi zuen «inguru horretako zuhaitz espeziek kontserbatzea» dela proiektuaren asmoa, eta horren zehaztasunak Iñigo Segurola Lur Paisajistak enpresako kideak eman zituen: «Txosten teknikoetan 15 zuhaitz identifikatuta ageri dira, eta horietatik %80 birlandatzea aurreikusten da, 13 platanondo. Eremu libreak inguruko egoera errespetatzen duten zuhaitz motez janztea aurreikusten du proiektuak; eta horrek indartu egiten du jasangarritasunarekiko konpromisoa».

Bestetik, azaldu zuten BCCk ez duela irabazi asmorik eta inork ez duela irabazirik eskuratzen. Datu zehatz bat ere mahai gainean jarri zuen zuzendariak: «Funts publikoetatik inbertitutako euro bakoitzak 2,8 euro sortu ditu».

ETORKIZUNERA BEGIRA

«GOe zientzia eta jakintzan oinarritutako ekosistema ireki gisa sortu da, eta gastronomiaren eta elikaduraren etorkizuneko erronka handiei erantzutera eta horiek betetzera bideratuko da», horrela definitu zuten proiektua. Donostiako Gros auzoan eraikiko da, eta Donostiako Udalak dagoeneko onetsi du aldi baterako lagapena, eraikin berria altxatzeko lur zatia.

Asier Aleak, BCCeko garapen globaleko zuzendariak, proiektuak barnebilduko dituen hiru ezaugarri nabarmendu zituen. Batetik, «berrikuntza bultzatzeko eta sustatzeko gune espezializatu baten premiari erantzutea»; bigarrenik, premia horri aurre egiteko lankidetza eremu fisiko bat sortzea; eta hirugarrenik, aldaketa klimatikoa. Aleak azaldutakoaren arabera, aldaketa klimatikoari aurre egiteko hiru gako ezberdinetan urratsak egin behar dira: energian, mugikortasunean eta agro-elikaduran. Eta azaldu zuen, lehenengo bietan aldaketak egon badira ere, elikadurari erreparatzeko garaia dela: «Gastronomiak alor sentsoriala ere lantzen du. Gure kulturari lotutako gastronomia jasangarria egin behar dugu».

Begoña Rodriguez BCC Innovation zentroko zuzendariak «berrikuntza irekia» eta «herritarren zientzia» nabarmendu zituen bere hitzartzean. Baieztatu zuen «zahartzen ari den herri bat elikatu» behar dela, eta horretarako pertsonak erdigunean jarriko dituen proiektuak sortu behar direla; besteak beste, gastronomia pertsonalizatua, jasangarria baina zaporetsua den elikadura, digitalizazio prozesuak edota euskal gastronomia.

HERRITARREN PARTE HARTZEA

BCCko kideek beharrezkotzat jo dute herritarren parte hartzea proiektua eraikitzeko prozesuan. Horretarako, atzo iluntzean bilera irekia egin zuten batetik; eta bestetik, ezagutarazi zuten informazio bulego bat zabalduko dutela edozein zalantza eta iritzi jasotzeko.

Auzotarrek asteazkenean egindako bilerara zergatik ez ziren agertu galdetuta, bilera hori lur eremuaren zesioaren inguruko eztabaida zela azaldu zuten, eta hori Udalak erantzun behar duela: «Zein partzela izan, ez da gure erabakia. Hori Udalak erantzun beharko du».