Martxoaren 5eko Reala-PSG partidaren aurreko kargetan larri zauritutako emakumeak aurkeztutako salaketa behin-behinean artxibatu egin dute. EiTBren arabera, ezin izan dute zehaztu nork tiro egin zion.

44 urteko emakumea Donostia Ospitaleko ZIUn artatu zuten, garunaren barruan odoljarioa zuelako, buruan kolpe bat jaso ondoren. Familiak baieztatu zuen zauria «zuzenean lokira jaurtitako» foam bala batek eragin ziola.

Ertzaintzaren kargek gutxienez hiru zauritu eragin zituzten, eta sei salaketa aurkeztu ziren. EITBren iturriek baieztatu dute bi kereila artxibatu direla eta dagozkion errekurtsoak jarri direla. Hala ere, zaurituaren bikoteak adierazi du «kausa guztiak artxibatu direla, bat izan ezik, zeinean desordena publikoengatik eginbideak ireki baitituzte».

Gainera, Josu Erkorekaren adierazpenak gaitzetsi ditu: «Amaia botilak eta harriak jaurtitzen ari ziren leku batean zegoela iradoki zuen».

«Nire emaztea bost edo hamar minutu inguruz egon zen telefono estaldura bila, Anoetan sartzeko sarrera tiketa kargatu ziezaion. Ez liteke egongo hamar minutuz erdian, harri eta botilen jaurtiketa batean. Edonork ulertzen du», adierazi du.

«Amaia oso zentzuduna da. Hamar urteko semearekin gindoazen futbolera, eta zorte txarra izan zuen, behar ez zuen tokian eta unean egotean. Ez dakigu norbaiten zuhurtziagabekeriarengatik edo zabarkeriengatik den. Eta ez digute jakiten uzten», gaineratu du.

Lakuak, bestalde, kolpea baieztatu du, baina adierazi du oraindik ez dakitela «nondik zetorren».