Ricardo Echepareren omenezko hitzaldiak izango dira UIKk ixteko

EHUren Udako Ikastaroak (UIK) bi hamarkada baino gehiagoz zuzendari izandako Ricardo Echepareri eskainitako amaierako hitzaldiekin bukatuko dira uda honetatik aurrera, gonbidatutako «pertsona ospetsu» baten eskutik.

Udako Ikastaroen bultzatzaile gisa eta ezagutzaren dibulgazioaren alde egindako ekarpena aitortzea da urtero, irailaren amaieran, Donostiako Miramar Jauregiko Errege Jangela aretoan egingo diren hitzaldi sorta berri hauen helburua. Areto horrek egungo Udako Ikastaroak abiatzeko funtsezko pieza izan zenaren izena ere hartuko du.

Eva Ferreira errektoreak eta Itziar Alkorta Udako Ikastaroen zuzendari akademikoak Donostian egindako agerraldian ekimenaren berri eman zuten. Jokin Bildarratz Lakuako Hezkuntza sailburuak eta Eneko Goia Donostiako alkateak ere parte hartu zuten.

Data zehatza eta hizlaria laster iragarriko diren arren, ikastaroen antolatzaileek adierazi zuten Juan Gonzalo Muga EHUko irakasleak egingo duela hasierako mintzaldia, ekainaren 24an, ‘‘Fisika kuantikoa: Txigorgailutik ordenagailura’’ deiturikoa.

Ferreirak nabarmendu zuen Echepare (Irun, 1942-2021) euskal unibertsitate publikoaren Udako Ikastaroen proiektua sortu zuen «intelektualen taldeko» kidea izan zela. Gogorarazi zuenez, 1981ean hasi ziren ikastaro horiek, «bederatzi ikastaro besterik ez», eta aurten ia berrehun jarduera egingo dituzte.

Echeparek «sobera irabazi du aitortza hau», esan zuen Bildarratzek. Azaldu zuenez, itxierako hitzaldi sorta berria «ezagutzaren transferentzia eta ikerketa zientifiko eta teknologikoaren eragin soziala», goi mailako hezkuntza, ingeniaritzetako prestakuntza duala edo «kalitatezko unibertsitate kudeaketa» bezalako gaiei buruzkoa izango da.

Sailburuak hezkuntzako profesionalentzat programa bereziak aurkeztu zituen. 17 ikastaro izango dira, hainbat arlotakoak, hala nola «STEAM irakaskuntza», «kultura digitalak gazteengan duen eragina», sexu hezkuntza, «heriotzaren pedagogia» eta dislexia edo beste nahasmendu batzuk.