Osakidetzak udan zehar Lehen Mailako Arretako 72 osasun-zentrotan ixteko ordutegia aurreratuko du, egun jakin batzuetan 44 itxiko ditu eta beste hamar ez ditu uda osoan behin ere irekiko, atzo jakinarazi zuenez.

Lakuako Osasun Sailak osasun-zentroetarako plan bat prestatu du, urtero udan egin ohi duen bezala, lanaldiak eta ordutegiak moldatzeko, egun horietan eskaria txikiagoa izaten dela eta langileek oporretako egunak hartzen dituztela argudiatuta.

Osasun Sailaren arabera, lehen mailako arretako 339 osasun-zentroetatik 155etan ez da lanaldian edo ordutegian aldaketarik egongo. 72tan itxiera-ordua aurreratuko da, 20.00etatik 17.00etara, 44 anbulatorio udako hilabeteetako egun batzuetan itxita egongo dira, eta 58tan oraindik ez da plangintza zehaztu.

70 ZENTRO GEHIAGOTAN MURRIZKETAK

Bestalde, normalean astean ordubetez irekita egoten diren osasun-zentroak guztiz itxita egongo dira udan zehar. Iaz 225 zentrotan Osakidetzak ez zuen inolako murrizketarik egin, baina oraingoan 155 baino ez dira izango inolako aldaketarik jasango ez dutenak.

ELA, CCOO eta ESK sindikatuek beste urte batez egingo diren murrizketa hauek salatu dituzte. Zentroen ordutegien murrizketa, langileen murrizketa eta beste langile batzuek aparteko orduak egin behar izatea eta EAGak medikurik gabe irekitzea deitoratu dute.

Sindikatuek atzo ohar baten bidez jakinarazi zutenez, mahai sektorialaren bileran hartutako erabakiak iaz baino osasun-zentro eta EAG gehiagori eragingo die, eta Osakidetzak aurreikusten du 1.000 lan txanda inguru bete gabe daudela udako sasoirako, kopurua zehaztu ez badute ere.

ELAk bere aldetik salatu zuenez, murrizketa hauek lan karga handia dakarte lanean ari diren langileentzat, eta «argi dago egiturazko arazo larriei aurre egiteko planik ez dagoela».

Sindikatu honen arabera, Lakuako Osasun Sailak dio ez dagoela murrizketarik, eta udan aplikatu beharreko neurri horiek langileen atsedena bermatzeko beharrezkoa den berrantolaketaren ondorio dira. «Errealitate bakarra da murrizketen aurrean gaudela, eta Osakidetzak justifikatu egin nahi dituela langileak eta haien eskubideak erabiliz», adierazi zuten ELAtik, «erabaki politikoen ondorioa» dela gaineratuz.

ESK-k, bestalde, Osakidetzako EAG batzuetan dagoen medikuen «estaldura falta» salatu zuen eta Osakidetzari «egoera lazgarri horri konponbiderik ez ematea» leporatu zion.

Honekin ados, CCOOk salatu zuenez, «aldi baterako adabaki» gisa hasi zena egiturazko gaitz bihurtu da, eta urtez urte errepikatzen ari da». Osakidetzak eta Osasun Sailak «profesionalak erakartzeko eta fidelizatzeko eta murrizketak errepikatu edo txikiagotu beharrik ez izateko epe ertain eta luzerako neurririk ez dutela hartu nahi» deitoratu zuten.

MEDIKUAK FALTAN DAGOENEKO

ESK-k ohartarazi zuenez, igandean, ekainaren 2an, ez zen medikurik egon Bermeoko EAGan, eta maiatzaren 25ean egoera berdinean egon ziren Bermeoko zein Zornotzako EAGak. Halaber, aipatu zuen maiatzaren 18an Amurrioko EAGan ere ez zela medikurik egon, eta egoera hori Laudioko EAGan dagoen medikuen «falta etengabeari» gehitu behar zaiola.

Sindikatu honetatik ohartarazi zutenez, «ESI horretako arduradunek hilabeteak daramatzate eskualde horretako biztanleen osasuna arriskuan jartzen eta aurreikuspen eta ardura falta erakusten dute, eta horrek berehalako kargugabetzea merezi du».