Nafarroako Administrazio Auzitegiak (NAA) ebatzi du Tuterako Udalak, Udaltzaingorako hiru lanpostu betetzeko deialdian, emakume hautagaientzako proba fisikoak gogortu egin zituela propio. Epai horrekin, auzitegiak aintzat hartu du ELAk, beste bi udal sindikatuekin batera, Udalaren kontra jarri zuen helegitea, sindikatuak jakinarazi duenez.

«Inongo justifikaziorik gabe», udaltzain izateko oposaketa publikoetako 1. eta 4. probak aldatu zituen Tuterako Udalak, «soilik emakume hautagaien» proba fisikoak zailduz. Horrekin, NAAk ebatzi du UPNk zuzentzen duen Udalak polizia kidegoetarako sarbideari buruzko Nafarroako eta Estatuko legedia urratu zuela, «emakumeen egoera genero kontuengatik okertuko duten neurriak» hartzea debekatzen baitu.