Buru nahasmendua dutenen %80k ez dute lanposturik lortzen

Buru osasun arazoak dituzten hamar pertsonatik zortzik ez dute lanposturik lortzen, Buru Osasuna Euskadi federazioak plazaratutako datuen arabera. Enpresa pribatuen zein erakunde publikoen inplikazioa eskatu dute arazoari heltzeko.

Buru osasun arazoak dituzten pertsonen eta senideen EAEko elkarteak biltzen dituen Buru Osasuna Euskadi federazioak aditzera eman duenez, osasun mentaleko arazo larriak diagnostikatuta dauzkaten pertsonen %18,9k soilik lortzen du lanpostu bat. Federazioak ezinbestekotzat jo du buru osasun arazoak dituzten pertsonei sistema soziosanitariotik eta enplegu sistematik laguntza eta babesa ematea, errekuperazioan aurrera egin dezaten. Erakundeetako eta elkarteetako ordezkariak Donostian bildu ziren ostegunean, Buru Osasunaren Munduko Egunaren karira.

«Lan bazterketa ez da zifra hotz bat bakarrik, ziurgabetasunari aurre egiten dioten milaka bizitza dira. Euskadin buru nahasmendua duten hamar pertsonatik zortzik ez dute enplegurik; oraindik herritar guztiak integratzen ikasi ez duen sistema baten isla da», esan zuen Maria Angeles Arbaizagoitia Buru Osasuna Euskadiko presidenteak. Federazioa espainiar Estatistika Institutu Nazionalaren (INE) datuetan oinarritu da, kolektiboaren langabezia zifra «desgaitasunen artean altuena dela eta buru osasun arazoak dituzten pertsonen marjinazio sozial eta ekonomikoa betikotzen duela» gaitzesteko.

Agifes, Asafes, Avifes eta Asasam elkarteak biltzen dituen federazioak konpromiso handiagoa eskatu zuen kolektiboaren lanpostuetarako sarbidearekin: «Lanak independentzia ekonomikoa emateaz gain, autorrealizazio pertsonala ere lortzen laguntzen du, eta horrek autoestimua nabarmen hobetzen du», adierazi zuen Arbaizagoitiak Donostiako udaletxean Buru Osasunaren Nazioarteko Egunean egindako ekitaldian.

Federazioaren arabera, oztopo hori gainditzeko, ezinbestekoa da enpresek eta erakundeek estigmak ezabatzen dituzten, lan inguruneak egokitzen dituzten eta laguntza pertsonalizatuak sustatzen dituzten politika inklusiboak ezartzea.

Gainera, «lan ingurune inklusiboak, buru osasun arazoak dituztenei mesede egiteaz gain, produktibitatea eta kohesioa hobetzen ditu erakundeen barruan, lan ingurune osasungarriagoak eta askotarikoagoak sortuz», azaldu zuten.

Era berean, Buru Osasuna Euskadik buru osasun arazoak dituzten pertsonei lotutako Estigmaren eta Diskriminazioaren aurkako Estrategia aplikatzea eskatzen du, enpresak eta gizartea oro har sentsibilizatzeko. «Helburuak izan behar du buru osasun arazoak dituzten pertsonek bizi-proiektu bat izateko aukera emango dien enplegu bat lortzea eta mantentzea», ohartarazi du euskal federazioak.