Aitor Irusta atzelari gazteak urtarrilaren 25ean egingo du debuta profesional mailan Asperekin. Eibarko enpresak atzo jakinarazi zuenez, bi urteko kontratua egin dio bizkaitarrari eta bere lehen partida Astelena pilotalekuan jokatuko du.

Irusta Munitibarren jaioa da eta 22 urte ditu, iazko maiatzaren 8an beteak. Bere fitxaren arabera 1,90 metro luze da eta 91 kilo pisatzen du. Profesionaletara jauzia egiteko aukera afizionatu mailan egin duen 2014 borobilari esker heldu zaio. Orain gutxi DV&Bankoa Torneoa irabazi zuen Iker Irribarriarekin bikotea osatuz, baina aurrez Herriarteko Txapelketa (Gernika ordezkatuz), Ortuellako Elortegi Memoriala eta Zestoako Dinastia Etxabe torneoak ere irabazi zituen atzelari bizkaitarrak.

Aspek bere webgunean jaso zuenez, Irustak pozez gainezka hartu du berria. «Oso pozik nago. Txikitatik beti amestu dudan aukera lortu dut. Edozein pilotariren ametsa beteko dut eta eskertzekoa da Aspek eman didan aukera», nabarmentzen zuen, bere kirol ibilbideko hurrengo urratsari gogotsu ekingo diola gaineratuz: «Oso ondo aprobetxatu nahi ditut bi urte hauek. Ikasi eta ikasi, eta ahal dudan guztia eman partida onak jokatu ahal izateko».

Irustaren fitxaketarekin, Aspek hamaika atzelari izango ditu bere koadroan: Barriola, Cecilio, Larrinaga, Merino I.a, Merino II.a, Rezusta, Tolosa, Urruzola, Zabaleta, Zubieta (Binakako Txapelketa amaitu arte Asegarceri utzita dagoena) eta Irusta bera. Esan liteke, Munitibarreko gazteak Iñigo Pascualen hutsunea beteko duela, Abartzuzako atzelari beteranoak oraintsu utzi baitu Aspe enpresa, 17 urtez goi mailan jokatu eta gero.

Aipatutako pilotari horien artean, Abel Barriola da zaharrena (36 urte), eta Zubieta da 30 urte beteak dituen bestea. Gainerakoak hortik behera daude, eta sei dira 25 urte bete gabeak.