1931n Hondarribian jaio zen arren, txikitan bakarrik eta oinez Frantziara ihes egin behar izan zuen, Gerra Zibila hasita zegoela. 1956an hasi zuen bere ibilbidea artista bezala, 25 urterekin, Madrileko San Fernando Arte Ederretako Eskolan. Gero, Bartzelonara joan zen Sant Jordi eskolan ikastera. Han ezagutu zituen abangoardiako beste artista batzuk, esate baterako, Tapies, Guinovart, Llorens-Artigas, Miro, Mensa eta Brossa.

1960ko hamarkadan, Parisetik igaro ondoren, Gipuzkoako Gaur taldeko partaide eta sortzaile izan zen Basterretxea, Chillida, Ruiz Balerdi, Oteiza, Amable Arias, Sistiaga eta Zumeta artistekin batera. Urte horietan Euskal Herran nahiz nazioartean ibili zen eta hamaika erakusketa antolatu zituen.

Ondoren, Intzako baserri batera joan zen bizitzera bere familiarekin eta geroago Hondarribira itzuli eta lantegia jarri zuen.

1980ko hamarkadaren amaieran, baina, B hepatitisa diagnostikatu zioten Mendibururi eta horrek bere produkzio artistikoa nabarmen murriztu zuen. Bartzelonako Ospitale Klinikoan gibeleko transplantea egin zioten eta hiri hartan bizi izan zen 1990ko apirilean hil zen arte.

Donostiako San Telmo museoan ikusi daitekeen Korrikaren testiguaz gain, Leioan ‘Titulurik gabeko eskultura’, Jaizkibelen ‘Herrien elkartasuna’ eta bere sorterrian ‘Txoria’ eskulturak ikusi daitezke, besteak beste.