Gaur zazpi urte hil zen Carlo Pedersoli, Bud Spencer izenez ezaguna den aktore italiarra, 2016ko ekainaren 27an. 86 urterekin hil zen. Interprete mitikoa oroitua da spaghetti western genero zinematografikoaren erreferente izateagatik. Horrez gain, gidoilaria, ekoizlea, abeslaria eta konpositorea ere izan zen.

Terence Hill aktorearekin batera bikote ahaztezin bat osatu zuen, haien film dibertigarrietan irribarreak zein kolpeak banatuta. Aro bat markatu zuten zineman Mendebalde urrunean, itsaso zabalean edo Miamiko Segurtasun Indarren zoritxarrak oinarri hartuta.

‘Dios perdona, yo no (1967)’ izan zen elkarrekin egin zuten lehen film luzea, eta horrek bide eman zion, bere lehen film arrakastatsua egiteko: ‘Le llamaban Trinidad’ (1971). Nahiz eta mendebalde basatian girotuta egon, bere ibilbide profesionaleko lehen zantzuak agertzen ziren: umorezko zinema amaiera katartikoekin, eta pertsonaien dualtasuna, Buden indar azkarrean eta ekintza zuzenean oinarrituta, Terence ausart eta manipulatzailearen aurrean. Azken film entzutetsua, ‘Y en Nochebuena se armó el belén’ (1994) izan zen.

Igerilaria izan zen; ona, gainera

Zinemaren munduan hasi baino lehen, igerilaria izan zen. 20 urterekin SS Lazio taldearekin hasi zen, eta 1949an Italiako txapelduna izan zen 100 metro estilo librean. Eta, ondoren, beste sei aldiz izan zen herrialdeko txapelduna proba horretan. 1952an eta 1956an Olinpiar Jokoetan parte hartu zuen.