Ludger Mees EHUko irakasleak ardoaren munduan ezaguna den ‘Organisation Internationale de la Vigne et du Vin’ (OIV) erakundearen saria jaso du ‘The History of Rioja wine. Tradition and invention’ lanagatik.

Historia Garaikideko katedraduna den Meesek Routledge argitaletxearekin argitaratu du Errioxako ardoaren historia biltzen duen liburua.

«Kontakizun informatibo, kronologiko eta sakona» da Meesen saritutako lana, azaldu du EHUk ohar batean. Saria Serbiak Parisen duen enbaxadan egindako gala batean jaso du irakasleak.

Sariaren harira, «liburuaren oinarri izan den ikerlan luze, batzuetan gogor eta beti ziragarri» horrentzat suposatzen duen «errekonozimendua» aipatu du Meesek.

Omenaldia ekoizleei

«Sari hau omenalditzat ere hartzen dut; hain zuzen ere, Errioxan kalitatezko ardoa sortzeko eta hobetzeko historian zehar etengabe lanean aritu diren ardogile txiki eta handi horiei guztiei, haien emazteei eta senitartekoei egindako omenalditzat», adierazi du EHUko katedradunak.

Gogoratu du lana «egiaztapen benetan harrigarri baten ondorioz» jaio zela: «gaur egun, Errioxako ardoa produktu oso ezaguna da, eta Espainiako Estatuan ez ezik, nazioarteko merkatuetan ere presentzia handia du, baina, hala eta guztiz ere, ez zegoen zorroztasun zientifikoz egindako argitalpenik edaten ari direnari buruz zerbait gehiago jakin nahi duten ardozaleek irakurtzeko».

Hutsune hori bete nahi izan du Meesek liburuarekin, Errioxako ardoak historiarekin eta kulturarekin dituen loturak nabarmenduz.