Martin Luther King Jr. 1929ko urtarrilaren 15ean jaio zen Estatu Batuetako Atlanta hirian. Ministro Kristaua eta aktibista antiarrazista izan zen, ezaguna indarkeriarik ezaren alde egiteagatik. 1968. urteko apirilaren 4an hil zuten Memphisen. Halaber, Vietnamgo gerraren edota pobreziaren aurkako protestekin ere bat egin zuen, besteak beste.

Eskubide zibilen aldeko mugimenduko buru eta bozeramailerik nabarmenetarikoa izatera iritsi zen. AEBetako segregazioa eta arraza-diskriminazioaren aurka indarkeriarik gabe borrokatzearen alde egindako apustuagatik Bakearen Nobel Saria jaso zuen 1964an.

Gazte-gaztetatik ibili zen eskubide zibilen aldeko aktibismoan. Hainbat ekintza baketsu antolatu zituen Estatu Batuetako beltzentzako boto eskubidea, diskriminaziorik eza eta oinarrizko beste eskubide zibil batzuk eskatzeko. Bere ekintzarik aipagarrienen artean daude Montgomeryko autobusen boikota, 1955ean; Southern Christian Leadership Conference (SCLC) delakoaren sorrerari emandako babesa, 1957an; eta Washingtoni buruzko Lanaren eta Askatasunaren aldeko Martxaren lidergoa, 1963ko abuztuan.

Hain zuzen ere, martxa horren amaieran eman zuen horren ezagun egin zen ‘I have a dream’ (Amets bat daukat) hitzaldia. Mugimenduak erreklamatzen zituen eskubide gehienak 1964ko Eskubide Zibilen Legea eta 1964ko Boto Eskubidearen Legea aldarrikatuz onartu ziren.

Hil ondoren, 1977an, Askatasunaren Domina Presidentziala eman zioten eta 1986tik aurrera Martin Luther King Jr.-en eguna ospatzen dute AEBn. Ekintzailearen urtebetetze egunaren bueltan izaten da jaieguna, urtarrileko hirugarren astelehenean.