50 gaztek parte hartuko dute aurten ‘La frontera fortificada’ memoria historikoarekin lotutako programan, Nafarroako Pirinioetan frankismoak langile behartuekin altxatutako bunkerrak aurkitzeko eta berreskuratzeko lanetan.

Nafarroako Gazteriaren Institutuak eta Nafarroako Memoriaren Institutuak antolatuta, Otsondoko mendatean eta Donezteben garatzen ari da programa aurten. Lehen txandan 25 gazte ari dira parte hartzen, eta bigarrenean, beste 25 gazte, Otsagabian eta Aezkoan (Orbaitzeta), ‘Eskolak memoriarekin’ programaren barruan.

Frankismoan eraikitako eta erabilitako babeslekuak berreskuratzea da helburua, gazteen boluntariotzaren bidez. Eremu horiek, aldi berean, errespetuaren, bakearen, berdintasunaren, elkartasunaren eta ekologiaren balioak elkartzeko eta trukatzeko gune gisa balio dute.

Ana Ollo bigarren presidenteorde eta Memoria eta Bizikidetza, Kanpo Ekintza eta Euskara sailburua izan da bertan, Fernando Anbustegi Baztango alkatearekin batera.

Ollok azpimarratu du garrantzitsua dela belaunaldi gazteenei memoria transmititzea, haien parte hartze aktiboa bultzatuz.

Era berean, gazteek erregimen frankistaren bidegabeko indarkeriaren oroimena bizirik mantentzeko konpromisoan izan behar duten protagonismoa nabarmendu du, gaur egun terrorearen politikak legitimatu nahi dituzten faxismoen gorakadaren testuinguruan. 

Otsondoko eremua

Otsondo eta Donezteben (Baztan eta Malerreka) garatzen ari den boluntariotza eremua Nafarroatik nahiz beste autonomia erkidego batzuetatik datozen 15 eta 17 urte bitarteko gazteei zuzenduta dago.

Nafarroako Pirinioetan, Otsondo mendatearen inguruan, Baztan ibarrean eta Donezteben, garatutako frankismoaren erresistentzia-zentroetako bunker batzuk berreskuratzeko lanean ari dira.

Zehaztu dutenez, Baztango bailara bera eta Bidasoatik Malerrekara doan sarbidea kontrolatzen zituzten gotorleku horietako batzuk garbitzen eta dokumentatzen ari dira. Gainera, gotorleku horien guztien eraikuntzari buruzko azalpenak, garaiko dokumentazioa eta arkeologia-erregistroaren oinarrizko nozioak jaso eta aisialdiko bisita eta jarduera desberdinak egiten dituzte.